Actress Gracy Singh : आमिर खानच्या गाजलेल्या ‘लगान’ चित्रपटाला २५ वर्षे पूर्ण होत असताना या चित्रपटातील अभिनेत्री ग्रेसी सिंग पुन्हा चर्चेत आली आहे. ‘लगान’मध्ये गौरीची भूमिका साकारून प्रेक्षकांची मनं जिंकणारी ग्रेसी सिंग एकेकाळी बॉलिवूडमधील आश्वासक अभिनेत्री मानली जात होती. मात्र, यशाच्या शिखरावर असतानाच तिने चित्रपटसृष्टीपासून दूर जाण्याचा मोठा निर्णय घेतला.

ग्रेसी सिंगने १९९७ मध्ये ‘अमानत’ या दूरदर्शन मालिकेतून अभिनय क्षेत्रात पदार्पण केले. त्यानंतर १९९९ मध्ये ‘सुंदरी बहू’ या बंगाली चित्रपटातून ती मोठ्या पडद्यावर झळकली. मात्र, तिच्या कारकिर्दीला खरी ओळख मिळाली ती २००१ मध्ये प्रदर्शित झालेल्या लगान या चित्रपटामुळे.

या चित्रपटाला ऑस्कर पुरस्कारांसाठी नामांकन मिळाले होते, तर ग्रेसी सिंगला या चित्रपटासाठी फिल्मफेअरच्या सर्वोत्तम पदार्पण अभिनेत्री पुरस्काराचे नामांकन मिळाले होते. यानंतर तिने ‘मुन्नाभाई एमबीबीएस’ आणि ‘गंगाजल’ यांसारख्या यशस्वी चित्रपटांमध्ये महत्त्वाच्या भूमिका साकारल्या.

हेही वाचा : Breaking News : केंद्र सरकारची अत्यंत मोठी घोषणा.! तेलाची समस्या दूर होणार; घेतला मोठा निर्णय

मात्र, सुरुवातीच्या यशानंतर तिची कारकीर्द अपेक्षित वेगाने पुढे जाऊ शकली नाही. हळूहळू ती मुख्य प्रवाहातील चित्रपटांपासून दूर गेली ती कायमचीच. ग्रेसी सिंग शेवटची ‘संतोषी माँ- सुनिये व्रत कथाएं’ या मालिकेत दिसली होती. या मालिकेत तिने संतोषी माताची भूमिका साकारली होती. त्यानंतर तिने मनोरंजन क्षेत्राला रामराम केला.

अध्यात्माची धरली कास 

ग्रेसी सिंग ४५ वर्षांची झाली असून अजूनही अविवाहित आहे. तिने आध्यात्मिक जीवनाची कास धरली आहे. ब्रह्मकुमारी संस्थेशी जोडल्यापासून तिने चित्रपट आणि मालिकांपासून स्वतःला दूर ठेवले आहे. सोशल मीडियावरही ती फारशी सक्रिय नसल्याने तिचे सार्वजनिक आयुष्यातील दर्शन क्वचितच घडते. एकेकाळी रुपेरी पडद्यावर चमकणारी ही अभिनेत्री आज आध्यात्मिक जीवनाचा मार्ग स्वीकारून जीवन जगत आहे.

हेही वाचा : Sai Tamhankar : नव्या दिग्दर्शकांसोबत काम करायला आवडतं; सई ताम्हणकरने व्यक्त केलं मत