Shashi Tharoor : केरळमधील वांडूर येथे शशी थरूर यांच्या ताफ्यावर कथित हल्ला झाला आहे. जमावातील काहींनी त्यांच्या कारमधील गनमॅनला बाहेर खेचत हल्ला केल्याची धक्कादायक माहिती समोर येत आहे. पोलिसांनी एका आरोपीला ताब्यात घेतले असून, इतरांची ओळख पटली असून त्यांना अटक करण्यात आली आहे. पोलिसांच्या माहितीनुसार, ही घटना शुक्रवारी उशीराने वांडूरमधील तिरुवल्लीजवळील चेल्लिथोड परिसरात घडली. थरूर हे काँग्रेस नेते ए. पी. अनिलकुमार यांच्या निवडणूक प्रचार कार्यक्रमाला उपस्थित राहण्यासाठी जात होते. वांडूर पोलिसांनी सांगितले की, खासदारांचे अंगरक्षक रतीश केपी यांच्या तक्रारीवरून गुन्हा दाखल करण्यात आला आहे. आरोपींचा पाच जणांचा एक गट दोन वाहनांमधून आला आणि त्यांनी खासदारांचा ताफा अडवला. ज्या रस्त्यावर ही घटना घडली तो खूप अरुंद आहे. अंगरक्षकाने केवळ पुढच्या वाहनाला ताफ्याला मार्ग देण्यासाठी वेग वाढवण्याची विनंती केली होती. यावरून वाद झाला आणि जेव्हा अंगरक्षकाने रस्ता मोकळा करण्याचा प्रयत्न केला, तेव्हा आरोपींनी कथितरित्या त्याच्यावर आणि चालकावर हल्ला केला. या घटनेनंतर, पोलिस आणि स्थानिक प्रशासनाने तातडीने कारवाई सुरू केली. काल रात्री उशिरा एका आरोपीला ताब्यात घेण्यात आले, तर उर्वरित आरोपींची ओळख पटली आहे. याप्रकरणी गुन्हा दाखल करण्यात आला असून तपास सुरू करण्यात आला आहे.
