kerala election 2026 : केरळ विधानसभा निवडणुकीच्या पार्श्वभूमीवर भाजपने आपला जाहीरनामा प्रसिद्ध करत मोठ्या घोषणा केल्या आहेत. महिलांना दरमहा २५०० रुपयांची आर्थिक मदत आणि गरीब कुटुंबांना वर्षाला दोन मोफत गॅस सिलिंडर देण्याचे आश्वासन देत पक्षाने मतदारांना आकर्षित करण्याचा प्रयत्न केला आहे. भाजपचे प्रदेशाध्यक्ष नितीन नबीन यांनी हा जाहीरनामा जाहीर केला. यामध्ये गरजू महिलांसाठी ‘भक्ष्य आरोग्य सुरक्षा कार्ड’ योजना प्रस्तावित असून, औषधे आणि किराणा खरेदीसाठी दरमहा २५०० रुपयांचा लाभ दिला जाणार आहे. तसेच गरीब कुटुंबांना दरवर्षी दोन एलपीजी सिलिंडर मोफत देण्यात येणार असून, एक सिलिंडर ओणम आणि दुसरा ख्रिसमसच्या काळात दिला जाणार आहे. याशिवाय, केरळमध्ये All India Institute of Medical Sciences (एम्स) स्थापन करण्याचे आश्वासनही देण्यात आले आहे. तिरुवनंतपुरम ते कन्नूरदरम्यान हाय-स्पीड रेल्वे नेटवर्क उभारण्याचाही जाहीरनाम्यात समावेश आहे. शबरीमला आणि गुरूवायूरसारख्या धार्मिक स्थळांच्या व्यवस्थापनासाठी देवस्वम मंडळाची पुनर्रचना करण्याचेही आश्वासन पक्षाने दिले आहे. दरम्यान, भाजपने विरोधकांवरही जोरदार टीका केली आहे. नितीन नवीन यांनी डाव्या आघाडीवर आणि काँग्रेसवर ‘मॅच फिक्सिंग’चा आरोप करत राज्याच्या जनतेची फसवणूक केल्याचा दावा केला. याचवेळी Rahul Gandhi यांनीही प्रतिक्रिया देत भाजप आणि डाव्या आघाडीवर टीका केली. केरळमधील ही निवडणूक दोन विचारसरणींमधील लढाई असल्याचे सांगत काँग्रेसच्या नेतृत्वाखालील यूडीएफच जनतेसाठी पर्याय असल्याचा दावा त्यांनी केला. केरळमध्ये ९ एप्रिल रोजी मतदान होणार असून २ मे रोजी निकाल जाहीर होणार आहे. या पार्श्वभूमीवर सर्वच पक्षांनी प्रचारात जोर लावला असून, निवडणूक चुरशीची होण्याची शक्यता आहे.
