Stock Market Today : कच्च्या तेलाच्या वाढत्या किमती आणि अमेरिका-इराण संघर्षामुळे निर्माण झालेल्या भू-राजकीय अनिश्चिततेचा परिणाम भारतीय शेअर बाजारावर झाला आहे. मंगळवारी सेन्सेक्स आणि निफ्टी सलग दुसऱ्या दिवशी घसरणीसह बंद झाले. बँकिंग आणि रिलायन्स इंडस्ट्रीजसारख्या मोठ्या कंपन्यांच्या समभागांमध्ये झालेल्या विक्रीमुळे बाजारावर दबाव वाढला.

30 समभागांचा बीएसई सेन्सेक्स 555.23 अंकांनी (0.73 टक्के) घसरून 75,577.58 अंकांवर बंद झाला. दिवसभरात तो 579.46 अंकांनी घसरून 75,553.35 अंकांपर्यंत खाली आला. एनएसईचा निफ्टी 144.05 अंकांनी (0.61 टक्के) घसरून 23,635.10 अंकांवर स्थिरावला.

सेन्सेक्समधील ICICI बँक, ॲक्सिस बँक, अल्ट्राटेक सिमेंट, कोटक महिंद्रा बँक, रिलायन्स इंडस्ट्रीज आणि एचडीएफसी बँकेच्या समभागांमध्ये मोठी घसरण झाली. त्याचवेळी भारत इलेक्ट्रॉनिक्स, अदानी पोर्ट्स, हिंदुस्तान युनिलिव्हर आणि इंटरग्लोब एव्हिएशनचे समभाग तेजीत राहिले.

गुंतवणूकदारांचे ₹1.46 लाख कोटींचे नुकसान –   (Stock Market Today )

एका व्यवहाराच्या दिवसापूर्वी म्हणजेच 07 September 2026 रोजी बीएसईवर (BSE) सूचिबद्ध असलेल्या सर्व समभागांचे एकूण मार्केट कॅप ₹4,87,71,593.02 कोटी होते. आज म्हणजेच 08 September 2026 रोजी ते घसरून ₹4,86,24,696.85 कोटींवर आले आहे. याचाच अर्थ असा की, गुंतवणूकदारांच्या भांडवलात आज ₹146,896.17 कोटींची मोठी घट झाली आहे.

दरम्यान, आंतरराष्ट्रीय बाजारात कच्च्या तेलाच्या किमती वाढल्या. ब्रेंट क्रूडची किंमत 1.45 टक्क्यांनी वाढून 98.36 डॉलर प्रति बॅरलवर पोहोचली आहे. तेलाच्या वाढत्या किमती आणि पश्चिम आशियातील तणावामुळे गुंतवणूकदारांमध्ये सावधगिरीचे वातावरण आहे.

आशियाई बाजारांमध्ये दक्षिण कोरियाचा कोस्पी, जपानचा निक्केई 225 आणि हाँगकाँगचा हँगसेंग घसरणीसह बंद झाले. मात्र, शांघायचा एसएसई कम्पोझिट निर्देशांक वाढीसह बंद झाला. युरोपीय बाजारांतही घसरणीचे वातावरण होते.

सोमवारी अमेरिकेतील शेअर बाजार ‘लेबर डे’निमित्त बंद होते. दरम्यान, सोमवारी परदेशी संस्थात्मक गुंतवणूकदारांनी (FII) भारतीय समभागांमध्ये 280.13 कोटी रुपयांची खरेदी केली. सोमवारी सेन्सेक्स 382.62 अंकांनी तर निफ्टी 118.55 अंकांनी घसरला होता.