Stock market : आठवड्याच्या शेवटच्या दिवशी भारतीय शेअर बाजारात संमिश्र वातावरण राहिले. कच्च्या तेलाच्या किमतीतील घसरणीमुळे बाजाराला आधार मिळाला. मात्र, माहिती-तंत्रज्ञान क्षेत्रातील कंपन्या आणि टाटा समूहातील काही समभागांमध्ये झालेल्या घसरणीमुळे सेन्सेक्स घसरला.

सेन्सेक्स 19 अंकांनी घसरला –
30 कंपन्यांचा बीएसई सेन्सेक्स 19.63 अंकांनी घसरून 74,294.96 अंकांवर बंद झाला. दिवसभरात तो 413.85 अंकांनी वाढून 74,728.44 अंकांपर्यंत पोहोचला होता. मात्र, व्यवहाराच्या शेवटच्या टप्प्यातील घसरणीमुळे ही वाढ टिकली नाही.

निफ्टीची सलग तिसऱ्या दिवशी वाढ –
एनएसईचा निफ्टी 75.80 अंकांनी वाढून 23,346.40 अंकांवर बंद झाला. निफ्टीची सलग तिसऱ्या दिवशी वाढ झाली.

सेन्सेक्समधील टीसीएसचा समभाग 4.33 टक्क्यांनी घसरला. टायटन 2.11 टक्के, एशियन पेंट्स 2 टक्के, मारुती 1.98 टक्के, टेक महिंद्रा 1.82 टक्के आणि टाटा स्टील 1.73 टक्क्यांनी घसरले. अदानी पोर्ट्स, पॉवर ग्रिड, एचडीएफसी बँक आणि भारती एअरटेलच्या समभागांना मात्र चांगली मागणी राहिली.

कच्च्या तेलाच्या किमतीत घसरण –
ब्रेंट कच्च्या तेलाची किंमत 1.35 टक्क्यांनी घसरून 103.40 डॉलर प्रति बॅरलवर आली. त्यामुळे महागाई, रुपयावरील दबाव आणि भारताच्या आयात खर्चाबाबत काहीसा दिलासा मिळाल्याचे एचएसटी वेल्थचे संस्थापक आणि मुख्य कार्यकारी अधिकारी हरिसेल्वन राधाकृष्णन यांनी सांगितले.

दरम्यान, एनएसईचा 22,569 कोटी रुपयांचा आयपीओ दुसऱ्या दिवशी पूर्णपणे भरला. याशिवाय, परदेशी संस्थात्मक गुंतवणूकदारांनी गुरुवारी 3,208.76 कोटी रुपयांचे समभाग विकले.

युरोपियन बाजारात घसरणीचे वातावरण होते. आशियातील प्रमुख बाजार मात्र वाढीसह बंद झाले.