प्रभात वृत्तसेवा माळेगाव – शिक्षण क्षेत्रात जागतिक स्तरावर झपाट्याने होणाऱ्या बदलांचा विचार करता, विद्यार्थ्यांना नव्या तंत्रज्ञानावर आधारित व्यावसायिक शिक्षण देणे काळाची गरज आहे, असे प्रतिपादन शिवनगर विद्या प्रसारक मंडळाचे अध्यक्ष खासदार शरद पवार यांनी केले.माळेगाव (ता. बारामती) येथील शिवनगर विद्या प्रसारक मंडळाच्या वार्षिक सर्वसाधारण सभेत ते बोलत होते. यावेळी उपमुख्यमंत्री व संस्थेचे उपाध्यक्ष अजित पवार, खासदार सुप्रिया सुळे, ॲड. राजेंद्र काटे, धन्यकुमार जगताप, विराज खलाटे, प्रवीण पोंदुकुले, रोहन देवकाते, डॉ. मोहन नेवसे, गणपतराव देवकाते, आशा जराड, नीलेश नलावडे, सचिव डॉ. धनंजय ठोंबरे, संचालक योगेश जगताप, कार्यकारी संचालक अशोक पाटील, सर्व संचालक व सभासद उपस्थित होते. पवार म्हणाले, “एआयसारख्या नव्या तंत्रज्ञानामुळे शिक्षणात क्रांतिकारी बदल घडत आहेत. विद्यार्थ्यांनी या बदलाशी जुळवून घेतले पाहिजे. संस्थेच्या माध्यमातून आर्थिकदृष्ट्या दुर्बल विद्यार्थ्यांसाठी ‘खासदार शरदचंद्रजी पवार शिष्यवृत्ती योजना’ यावर्षीपासून सुरू करण्यात येणार आहे.उपमुख्यमंत्री पवार म्हणाले की, कृषी, उद्योग आणि सेवाक्षेत्रात एआयचा वापर वाढत आहे. त्यामुळे विद्यार्थ्यांनी ही कौशल्ये आत्मसात करणे अत्यावश्यक आहे. संस्थेच्या सर्वांगीण विकासासाठी विद्यापीठ स्तरावरील तज्ज्ञ समितीच्या मार्गदर्शनाखाली कामे राबवली जातील.संस्थेचे सचिव डॉ. धनंजय ठोंबरे यांनी विविध शैक्षणिक उपक्रमांची माहिती दिली. एआयएमएल, मेकॅट्रॉनिक्स, कॉम्प्युटर सायन्स यांसारख्या नव्या अभ्यासक्रमांसाठी प्रयोगशाळा उभारणीचे काम सुरू असल्याचे त्यांनी सांगितले. माजी उपाध्यक्ष ॲड. केशवराव जगताप यांनी संस्थेच्या प्रगतीचा आढावा घेत आभार मानले. महालक्ष्मी समूहकडून दोन कोटींचा निधी.. माळेगाव साखर कारखाना संचलित शिवनगर विद्या प्रसारक मंडळ ही एक दर्जेदार व विश्वासार्ह संस्था असून ऊस उत्पादक शेतकऱ्यांच्या मुलांना उच्च दर्जाचे शिक्षण देण्याचे कार्य करीत आहे. महालक्ष्मी उद्योग समूह व माजी विद्यार्थी संघटनेच्या सहकार्याने विविध उपक्रमांसाठी सुमारे २ कोटी ८० लाख रुपयांचा निधी उपलब्ध होणार आहे, अशी माहिती संचालक नितीन सातव यांनी दिली. आयुर्वेदिक महाविद्यालयातून ३.१७ कोटींचे उत्पन्न.. बारामतीत सुरू करण्यात आलेल्या आयुर्वेदिक महाविद्यालयासाठी उपमुख्यमंत्री अजित पवार यांनी संस्थेच्या जागेचा तात्पुरता वापर करण्यास मान्यता दिली. या भाडेतत्त्वावरील उपक्रमातून संस्थेला सुमारे ३ कोटी १७ लाख रुपयांचे उत्पन्न मिळाले आहे, अशी माहिती संचालक स्वप्निल जगताप यांनी दिली.
