कोयनानगर : सातारा जिल्ह्याचे पालकमंत्री तथा महाराष्ट्राचे पर्यटन, खनिकर्म व माजी सैनिक कल्याण मंत्री शंभूराज देसाई यांनी पाटण शहरातील सुरू असलेल्या विविध विकासकामांची प्रत्यक्ष पाहणी करून संबंधित अधिकाऱ्यांना कामाचा दर्जा आणि गती वाढवण्याच्या सूचना दिल्या.

पाटणमधील रस्ते, पूल, प्रशासकीय इमारती, उपजिल्हा रुग्णालय, पिण्याच्या पाण्याची टाकी आणि एसटी डेपो यासारख्या प्रकल्पांच्या प्रगतीचा आढावा घेण्यासाठी हा दौरा आयोजित करण्यात आला होता. पाहणीदरम्यान जिल्हाधिकारी संतोष पाटील, मुख्य कार्यकारी अधिकारी यशनी नागराजन, पोलीस अधीक्षक तुषार दोशी, सार्वजनिक बांधकाम विभागाचे अधीक्षक अभियंता संतोष रोकडे, उपविभागीय अधिकारी सोपान टोम्पे, तहसीलदार अनंत गुरव यांच्यासह विविध विभागांचे अधिकारी उपस्थित होते.

मंत्री देसाई यांनी प्रत्येक ठिकाणी थांबून कामांची पाहणी केली आणि अधिकाऱ्यांकडून सविस्तर माहिती घेतली. त्यांनी कामांच्या वेळापत्रकाचे पालन, दर्जाची खात्री आणि आवश्यक सुधारणांवर भर दिला. “नागरिकांच्या गरजा पूर्ण करण्यासाठी शासन कटिबद्ध आहे. प्रत्येक विकासकाम केवळ कागदावर न राहता दर्जेदार आणि वेळेत पूर्ण झाले पाहिजे,” असे त्यांनी स्पष्ट केले.

या दौऱ्यामुळे स्थानिक नागरिकांमध्ये समाधानाची भावना असून, रखडलेली कामे आता गती घेत असल्याचे त्यांचे मत आहे. “पाटणचा सर्वांगीण विकास हे आमचे प्राधान्य आहे. नागरिकांना सुविधा वेळेत मिळाव्यात यासाठी कामे दर्जेदार आणि वेळेत पूर्ण करण्याच्या सूचना दाव्यात आल्या आहात. यात कोणतीही तडजोड चालणार नाही,” असे पालकमंत्री देसाई यांनी सांगितले.