Shaikh Abdul Hannan : बांगलादेशचे माजी हवाई दल प्रमुख शेख अब्दुल हन्नान (Shaikh Abdul Hannan) यांना भ्रष्टाचाराच्या आरोपांप्रकरणी कतारमध्ये अटक करण्यात आली आहे. बांगलादेशातल्या अँटी करप्शन कमिटीच्या अधिकाऱ्यांनी अशी ही माहिती दिली.

निवृत्त एअर चीफ मार्शल शेख अब्दुल हन्नान (Shaikh Abdul Hannan) यांनी आपल्या उत्पन्नाच्या ज्ञान स्रोतांपेक्षा जास्त ३.२८ कोटी टका इतक्या किंमतीची मालमत्ता जमवली आणि आपल्या ६ वैयक्तिक बँक खात्यांच्या माध्यमातून २७.६३ कोटी टका किंमतीचे संशयास्पद व्यवहार केल्याचाही आरोप आहे. हन्नान यांना कतारच्या अधिकाऱ्यांनी १५ ऑक्टोबर रोजी अटक केली असे एसीसीचे उपसंचालक मोहम्मद अख्तरुल इस्लाम यांनी सांगितले.

आर्थिक व्यवहारांच्या तपासणीनंतर गेल्या वर्षी जुलैमध्ये हन्नान (Shaikh Abdul Hannan) यांच्यावर आरोपपत्र ठेवण्याचा निर्णय घेण्यात आला. त्यानंतर हन्नान यांना ताब्यात घेण्यासाठी एसीसीने इंटरपोलचीही मदत मागितली होती. हन्नान यांच्या पत्नीही या प्रकरणात आरोपी आहेत. त्यांनी पतीच्या मदतीने, उत्पन्नाच्या ज्ञात स्रोतांच्या पलीकडे जाऊन १.९१ कोटींहून अधिक टकांची मालमत्ता जमवल्याचा आरोप आहे.