Service Tax Online – पिंपरी चिंचवड महापालिकेच्या झोपडपट्टी निर्मूलन व पुनर्वसन विभागामार्फत आता सेवाकर घरबसल्या ऑनलाइन पद्धतीने भरण्याची सुविधा उपलब्ध करून देण्यात आली आहे. क्युआर कोडद्वारे सहज व सुरक्षितपणे सेवाकर भरणे शक्य झाल्याने नागरिकांचा वेळ व श्रम वाचणार असून डिजिटल सेवांकडे महापालिकेचा आणखी एक प्रभावी टप्पा पूर्ण झाला आहे. तरी नागरिकांनी या सुविधेचा लाभ घेऊन लवकरात लवकर सेवाकराचा भरणा करावा, असे आवाहन महापालिकेच्या वतीने करण्यात आले आहे. झोपडपट्टी निर्मूलन व पुनर्वसन विभागामार्फत राष्ट्रीय नागरी उपजीविका अभियानांतर्गत महिला बचत गटांच्या प्रतिनिधींमार्फत झोपडपट्टीवासियांना सेवाकर बिलांचे वितरण करण्यात आले आहे. हे बिल भरण्याची ऑनलाईन सुविधा देखील सुरू करण्यात आली आहे. सेवाकर बिलाच्या खालच्या उजव्या बाजूस एक क्युआर कोड देण्यात आला आहे. हा क्युआर कोड स्कॅन करून ऑनलाईन स्वरूपात सेवाकर बिलाचा भरणा करता येणार आहे. तरी या सुविधेचा लाभ घेऊन सेवाकर भरावा, असे आवाहन करण्यात आले आहे. “सेवाकर बिलावर देण्यात आलेल्या क्युआर कोडद्वारे काही सेकंदांत ऑनलाइन भरणा करता येणार आहे. महिला बचत गटांच्या माध्यमातून बिलांचे वितरण करून नागरिकांपर्यंत ही सुविधा प्रभावीपणे पोहोचविण्यात आली असून, सर्व लाभार्थ्यांनी वेळेत सेवाकर भरणा करावा.” – अण्णा बोदडे, उपायुक्त, पिंपरी चिंचवड महापालिका
