EV Sales September : भारतात इलेक्ट्रिक वाहनांची (EV) मागणी वेगाने वाढत असल्याचे सप्टेंबरमधील विक्रीच्या आकडेवारीवरून दिसून आले आहे. फेडरेशन ऑफ ऑटोमोबाइल डीलर्स असोसिएशन्स (FADA) नुसार, सप्टेंबरमध्ये देशभरात तब्बल 3 लाख 33 हजार 634 इलेक्ट्रिक वाहनांची किरकोळ विक्री झाली. गेल्या वर्षी सप्टेंबरच्या तुलनेत ही विक्री 74 टक्क्यांनी वाढली आहे. ही आतापर्यंतची एका महिन्यातील सर्वाधिक EV विक्री ठरली आहे.

सर्व वाहनांच्या विक्रीत EV चा वाटाही वाढला आहे. सप्टेंबरमध्ये हा वाटा सुमारे 13 टक्के झाला. सप्टेंबर 2025 मध्ये तो सुमारे 10 टक्के होता. इलेक्ट्रिक दुचाकी आणि इलेक्ट्रिक कारच्या वाढलेल्या मागणीमुळे एकूण EV विक्रीला मोठी चालना मिळाली.

FADA चे अध्यक्ष साई गिरिधर यांनी सांगितले की, सप्टेंबरमधील EV विक्रीने केवळ गेल्या वर्षीचा आकडा ओलांडलेला नाही, तर आतापर्यंतचा विक्रीचा विक्रमही मोडला आहे. सणासुदीची मागणी, पेट्रोल-डिझेलच्या तुलनेत कमी खर्च, बाजारात उपलब्ध असलेले विविध मॉडेल आणि PM E-DRIVE योजनेसह राज्य सरकारांच्या योजनांमुळे ग्राहकांचा EV कडे कल वाढत आहे.

इलेक्ट्रिक दुचाकींची विक्री सर्वाधिक

सप्टेंबरमध्ये इलेक्ट्रिक दुचाकींची विक्री 2 लाख 7 हजार 314 झाली. गेल्या वर्षीच्या तुलनेत त्यात 88.67 टक्के, तर ऑगस्टच्या तुलनेत 13.16 टक्के वाढ झाली. या वाहनांचा एकूण दुचाकी विक्रीतील EV वाटा 11.6 टक्क्यांवर पोहोचला. गेल्या वर्षी तो 8.2 टक्के होता.

इलेक्ट्रिक कारचीही विक्रमी विक्री

इलेक्ट्रिक प्रवासी वाहनांची म्हणजेच इलेक्ट्रिक कारची विक्री सप्टेंबरमध्ये 36 हजार 108 झाली. वार्षिक आधारावर त्यात 94.56 टक्के, तर महिन्याच्या तुलनेत 17.63 टक्के वाढ झाली. या श्रेणीतील EV चा वाटा 5.7 टक्क्यांवरून वाढून 8.5 टक्के झाला.

इलेक्ट्रिक तीनचाकी वाहनांची विक्री 86 हजार 24 झाली. गेल्या वर्षीच्या तुलनेत ती 40 टक्के आणि महिन्याच्या तुलनेत 7.74 टक्क्यांनी वाढली. या श्रेणीत EV चा वाटा तब्बल 64.9 टक्के आहे.

इलेक्ट्रिक व्यावसायिक वाहनांची विक्री सप्टेंबरमध्ये 4 हजार 188 झाली. महिन्याच्या तुलनेत विक्री 10.9 टक्क्यांनी कमी झाली असली, तरी गेल्या वर्षीच्या तुलनेत ती 158 टक्क्यांनी वाढली. या श्रेणीतील EV चा वाटा 2.16 टक्क्यांवरून सुमारे 4 टक्के झाला.