Share Market Rally : आठवड्याच्या सुरुवातीला घसरण झाल्यानंतर भारतीय शेअर बाजाराने मंगळवारी जोरदार कमबॅक केले. आयटी, बँकिंग आणि एफएमसीजी कंपन्यांच्या शेअर्समध्ये झालेल्या खरेदीमुळे सेन्सेक्स १,१०९ अंकांनी वधारला. रुपयाची सुधारलेली स्थिती आणि दीर्घकालीन भांडवली नफा कराबाबत अर्थमंत्री निर्मला सीतारामन यांनी केलेल्या वक्तव्याचाही बाजारातील वातावरणावर सकारात्मक परिणाम झाला.

बीएसईचा ३० शेअर्सचा सेन्सेक्स १,१०९.१० अंकांनी म्हणजेच १.५४ टक्क्यांनी वाढून ७३,०३३.७८ अंकांवर बंद झाला. दिवसभरात तो १,१२०.९९ अंकांनी वाढून ७३,०४५.६७ अंकांपर्यंत पोहोचला. गेल्या चार महिन्यांतील एका दिवसातील ही सेन्सेक्सची सर्वोत्तम वाढ ठरली.

एनएसईचा निफ्टी ३५८.६० अंकांनी म्हणजेच १.६० टक्क्यांनी वाढून २२,७२१.९५ अंकांवर बंद झाला. दोन महिन्यांहून अधिक काळातील ही निफ्टीची एका दिवसातील मोठी वाढ आहे.

आयटी शेअर्समध्ये मोठी खरेदी –

आयटी शेअर्समध्ये मोठी खरेदी झाली. एचसीएल टेकचा शेअर ८.२८ टक्क्यांनी वाढला. कंपनीचा जुलै-सप्टेंबर तिमाहीतील एकत्रित निव्वळ नफा २१.१८ टक्क्यांनी वाढून ५,१३२ कोटी रुपये झाला. कंपनीच्या एआय व्यवसायातील वाढ आणि करखर्चात झालेली घट यामुळे नफ्यात वाढ झाली.

टीसीएसचा शेअर ६.५९ टक्के, टेक महिंद्रा ४.९० टक्के आणि इन्फोसिस ४.४४ टक्क्यांनी वधारले. एचयूएल, टायटन, बजाज फायनान्स, एसबीआय, एचडीएफसी बँक, एमअँडएम आणि आयसीआयसीआय बँकेच्या शेअर्समध्येही वाढ झाली. मात्र कोटक महिंद्रा बँक, एटरनल आणि मारुतीच्या शेअर्समध्ये घसरण झाली.

₹4.15 लाख कोटींनी वाढली गुंतवणूकदारांची संपत्ती

एक व्यावसायिक दिवस आधी म्हणजेच १२ ऑक्टोबर २०२६ रोजी बीएसईवर सूचीबद्ध असलेल्या सर्व शेअर्सचे एकूण मार्केट कॅप ₹4,65,91,974.21 कोटी होते. आज म्हणजेच १३ ऑक्टोबर २०२६ रोजी ते वाढून ₹4,70,07,567.40 कोटींवर पोहोचले. याचा अर्थ असा की, आज गुंतवणूकदारांच्या भांडवलात ₹415,593.19 कोटींची वाढ झाली आहे.

जागतिक बाजारातील कच्च्या तेलाचा दर असलेल्या ब्रेंट क्रूडमध्ये १.६६ टक्क्यांची घट होऊन तो १०४.६ डॉलर प्रति बॅरलवर आला.

अर्थमंत्री निर्मला सीतारामन यांनी मंगळवारी दीर्घकालीन भांडवली नफा कर (LTCG – शेअर्स किंवा मालमत्ता दीर्घकाळ ठेवल्यानंतर विकल्यावर झालेल्या नफ्यावर लागणारा कर) आणि सिक्युरिटीज ट्रान्झॅक्शन टॅक्स (STT – शेअर्सची खरेदी-विक्री करताना सरकारला द्यावा लागणारा कर) याबाबत चर्चा सुरू असल्याचे सांगितले. या विषयावर चर्चा होणे चांगले असून, त्या संबंधित मते ऐकून घेण्यास उत्सुक असल्याचे त्यांनी सांगितले. त्यांच्या वक्तव्यानंतर मोठ्या कंपन्यांच्या शेअर्समध्ये खरेदी वाढली.

रुपया डॉलरच्या तुलनेत ९५.३७ रुपयांवर –

दरम्यान, रुपया सुमारे ४१ पैशांनी मजबूत होऊन डॉलरच्या तुलनेत ९५.३७ रुपयांवर पोहोचला. रुपयाच्या वाढीचा हा सलग तिसरा दिवस आहे. आरबीआयने डेरिव्हेटिव्ह्ज (भविष्यातील शेअर किंवा इतर वस्तूंच्या किमतीवर आधारित व्यवहारांचा बाजार) बाजारातील सट्टेबाजीवर नियंत्रणासाठी उपाय जाहीर केल्यानंतर रुपयाला आधार मिळाला. तीन दिवसांत रुपया १.५ टक्क्यांहून अधिक मजबूत झाला आहे.

आशियाई बाजारात दक्षिण कोरियाचा कोस्पी ५.४६ टक्क्यांनी घसरला. जपानचा निक्केई २२५ निर्देशांकही खाली बंद झाला. मात्र शांघाय आणि हँगसेंग निर्देशांक वाढीसह बंद झाले. युरोपातील बाजारही वाढीसह व्यवहार करत होते.

सोमवारी परदेशी संस्थात्मक गुंतवणूकदारांनी (FII) १,७०८.४८ कोटी रुपयांच्या शेअर्सची विक्री केली होती. सोमवारी सेन्सेक्स ५४७.६५ अंकांनी घसरून ७१,९२४.६८ अंकांवर, तर निफ्टी १५७.१० अंकांनी घसरून २२,३६३.३५ अंकांवर बंद झाला होता.