Stock Market : सलग दोन दिवसांच्या मोठ्या घसरणीनंतर भारतीय शेअर बाजाराने शुक्रवारी जोरदार कमबॅक केले. माहिती-तंत्रज्ञान (IT) कंपन्यांच्या शेअर्समध्ये झालेली खरेदी आणि कच्च्या तेलाच्या दरात झालेली घट यामुळे बाजाराला मोठा आधार मिळाला. सेन्सेक्स 879 अंकांनी, तर निफ्टी 288 अंकांनी वधारला.

30 कंपन्यांचा सेन्सेक्स 879.09 अंकांनी म्हणजेच 1.23 टक्क्यांनी वाढून 72,472.33 अंकांवर बंद झाला. दिवसभरात सेन्सेक्स 1,075.96 अंकांनी वाढून 72,669.20 अंकांपर्यंत पोहोचला होता. 50 कंपन्यांचा निफ्टी 288.65 अंकांनी म्हणजेच 1.30 टक्क्यांनी वाढून 22,520.45 अंकांवर बंद झाला.

सेन्सेक्समधील ITCचा शेअर 4.78 टक्के आणि TCSचा शेअर 4.23 टक्क्यांनी वाढला. TCSचा जुलै-सप्टेंबर तिमाहीतील निव्वळ नफा 15 टक्क्यांनी वाढून 13,884 कोटी रुपये झाला आहे. त्यामुळे IT क्षेत्रातील शेअर्समध्ये उत्साह दिसून आला. अदानी पोर्ट्स, इन्फोसिस, एचसीएल टेक, लार्सन अँड टुब्रो आणि एचडीएफसी बँकेचे शेअर्सही वधारले. रिलायन्स इंडस्ट्रीजचा शेअर मात्र घसरला.

जागतिक बाजारात कच्च्या तेलाचा दर कमी झाला. ब्रेंट क्रूडचा दर 1.32 टक्क्यांनी घसरून 102.9 डॉलर प्रति बॅरलवर आला. त्यामुळे भारतीय बाजारातील गुंतवणूकदारांचा विश्वास वाढला.

जिओजित चे संशोधन प्रमुख विनोद नायर यांच्या मते, अलीकडील मोठ्या घसरणीनंतर गुंतवणूकदारांनी कमी किमतीत शेअर्सची खरेदी केली. IT कंपन्यांच्या चांगल्या तिमाही निकालांमुळे आणि AIमधून मिळणाऱ्या उत्पन्नाच्या अपेक्षेमुळे या क्षेत्रातील शेअर्समध्ये मोठी खरेदी झाली.

एक दिवस आधी मोठी घसरण

गुरुवारी (8 ऑक्टोबर) सेन्सेक्स 1,045.46 अंकांनी म्हणजेच 1.44 टक्क्यांनी घसरून 71,593.24 अंकांवर बंद झाला होता. निफ्टीही 371.25 अंकांनी म्हणजेच 1.64 टक्क्यांनी घसरून 22,231.80 अंकांवर आला होता. त्यामुळे शुक्रवारी बाजारात झालेली वाढ गुंतवणूकदारांसाठी मोठा दिलासा ठरली.

दरम्यान, गुरुवारी परदेशी संस्थात्मक गुंतवणूकदारांनी (FII) भारतीय शेअर बाजारातून 12,943.58 कोटी रुपयांचे शेअर्स विकले होते.