Stock Market : कच्च्या तेलाच्या दरात झालेली वाढ, परदेशी गुंतवणूकदारांकडून सुरू असलेली शेअर विक्री आणि रोख्यांच्या वाढलेल्या दरांमुळे भारतीय शेअर बाजारात सोमवारी मोठी घसरण झाली. आठवड्याच्या पहिल्याच दिवशी बाजारातील सुरुवातीची तेजी टिकली नाही.

मुंबई शेअर बाजाराचा प्रमुख निर्देशांक सेन्सेक्स 547.65 अंकांनी म्हणजेच 0.76 टक्क्यांनी घसरून 71,924.68 अंकांवर बंद झाला. दिवसभरात सेन्सेक्स 796.23 अंकांपर्यंत घसरून 71,676.10 अंकांवर आला होता.

राष्ट्रीय शेअर बाजाराचा निफ्टी 157.10 अंकांनी म्हणजेच 0.70 टक्क्यांनी घसरून 22,363.35 अंकांवर बंद झाला.

गुंतवणूकदारांचे ₹15.29 लाख कोटींचे नुकसान –

एक व्यावसायिक दिवस आधी म्हणजेच 09 ऑक्टोबर 2026 रोजी बीएसईवर सूचीबद्ध सर्व शेअर्सचे एकूण मार्केट कॅप ₹4,80,81,272.62 कोटी होते. आज म्हणजेच 12 ऑक्टोबर 2026 रोजी ते घसरून ₹4,65,51,750.14 कोटी झाले आहे. याचा अर्थ आज गुंतवणूकदारांच्या संपत्तीत ₹15,29,522.48 कोटींची घट झाली आहे.

सेन्सेक्समधील कंपन्यांमध्ये आयटीसी, टेक महिंद्रा, हिंदुस्तान युनिलिव्हर, लार्सन अँड टुब्रो, स्टेट बँक ऑफ इंडिया आणि टाटा कन्सल्टन्सी सर्व्हिसेस यांच्या शेअरमध्ये मोठी घसरण झाली. तर भारत इलेक्ट्रॉनिक्स, महिंद्रा अँड महिंद्रा, कोटक महिंद्रा बँक आणि एचसीएल टेक यांच्या शेअरमध्ये तेजी दिसून आली.

दरम्यान, आंतरराष्ट्रीय बाजारातील ब्रेंट क्रूड तेलाचा दर 1.14 टक्क्यांनी वाढून 105.8 डॉलर प्रति बॅरलवर पोहोचला. तेलाच्या दरवाढीचा परिणाम भारतासारख्या मोठ्या प्रमाणात तेल आयात करणाऱ्या देशांवर होऊ शकतो.

परदेशी संस्थात्मक गुंतवणूकदारांनी (FII) शुक्रवारी भारतीय शेअर बाजारातून 3,568.90 कोटी रुपयांचे शेअर्स विकले, अशी माहिती शेअर बाजाराच्या आकडेवारीतून समोर आली.

जिओजित इन्व्हेस्टमेंट्स लिमिटेडचे संशोधन प्रमुख विनोद नायर यांच्या मते, 10 वर्षांच्या सरकारी रोख्यांचा दर तीन वर्षांच्या उच्चांकावर पोहोचला असून परदेशी गुंतवणूकदारांकडून सातत्याने पैसे बाहेर जात आहेत. त्यामुळे बाजारातील वातावरणावर दबाव आला.

आशियाई बाजारांमध्येही घसरण झाली. दक्षिण कोरियाचा कोस्पी 3.65 टक्क्यांनी घसरला, तर शांघायचा एसएसई कम्पोझिट निर्देशांकही खाली आला. हँगसेंग निर्देशांक मात्र किंचित वाढून बंद झाला. युरोपातील प्रमुख बाजारांमध्ये तेजी होती.

यापूर्वी शुक्रवारी सेन्सेक्स 879.09 अंकांनी वाढून 72,472.33 अंकांवर, तर निफ्टी 288.65 अंकांनी वाढून 22,520.45 अंकांवर बंद झाला होता.