Stock Market : भारतीय शेअर बाजारात बुधवारी (26 ऑगस्ट) सुरुवातीची तेजी ओसरली आणि प्रमुख निर्देशांक घसरणीसह बंद झाले. रिलायन्स इंडस्ट्रीज आणि आयटी क्षेत्रातील समभागांवर विक्रीचा दबाव राहिल्याने बाजाराला फटका बसला. सेन्सेक्स 183.15 अंकांनी घसरून 77,472.94 वर, तर निफ्टी 126.80 अंकांच्या घसरणीसह 24,207.75 वर बंद झाला.

30 कंपन्यांचा सेन्सेक्स दिवसभरात 77,986.84 वर पोहोचला होता. मात्र, त्यानंतर तो 77,472.94 पर्यंत घसरला. त्यामुळे दिवसभरात निर्देशांकात 513.90 अंकांची उलाढाल झाली.

सेन्सेक्समधील इन्फोसिस, भारती एअरटेल, एलअँडटी, पॉवर ग्रिड, टेक महिंद्रा, एनटीपीसी, महिंद्रा अँड महिंद्रा आणि रिलायन्स इंडस्ट्रीज हे प्रमुख घसरणारे शेअर्स ठरले. दुसरीकडे कोटक महिंद्रा बँक, अल्ट्राटेक सिमेंट, ॲक्सिस बँक आणि टाटा स्टील यांच्या शेअर्समध्ये तेजी दिसून आली.

गुंतवणूकदारांचे 82740 कोटी रुपयांचे नुकसान –

25 ऑगस्ट रोजी, बीएसईवर सूचीबद्ध असलेल्या सर्व शेअर्सचे एकूण बाजार भांडवल 4,94,64,258.58 कोटी रुपये होते. आज, 26 ऑगस्ट रोजी, ते घसरून 4,93,81,518.40  कोटी रुपये झाले आहे. याचा अर्थ असा की, आज गुंतवणूकदारांच्या भांडवलात 82,740.18 कोटी रुपयांची घट झाली आहे.

एनरिच मनी चे मुख्य कार्यकारी अधिकारी पोनमुडी आर. यांच्या मते, सुरुवातीच्या वाढीनंतर गुंतवणूकदारांनी नफा वसुली केल्याने बाजारात घसरण झाली. आयटी, एफएमसीजी, ऑटो आणि कन्झ्युमर ड्युरेबल्स क्षेत्रातील कमजोरीने बाजारावर दबाव आणला. मात्र, कच्च्या तेलाच्या दरातील घट आणि जागतिक बाजारातील सकारात्मक वातावरणामुळे घसरण काही प्रमाणात मर्यादित राहिली.

दरम्यान, ब्रेंट क्रूडच्या दरात 2.96 टक्क्यांची घट होऊन तो 85.96 डॉलर प्रति बॅरलवर आला. स्ट्रेट ऑफ होर्मुझ परिसरातील तणाव कमी होण्याच्या अपेक्षेमुळे कच्च्या तेलाच्या दरात घसरण झाल्याचे पीएल कॅपिटल चे मुख्य बिझनेस ऑफिसर-अॅडव्हायजरी अँड डीलिंग विक्रम कासट यांनी सांगितले.

आशियाई बाजारात दक्षिण कोरियाचा कोस्पी, जपानचा निक्केई 225, शांघाय SSE कम्पोझिट आणि हाँगकाँगचा हँगसेंग निर्देशांक वाढीसह बंद झाले. युरोपीय बाजारातही बहुतांश निर्देशांक तेजीत होते. अमेरिकन बाजार मंगळवारी सकारात्मक पातळीवर बंद झाले.

दरम्यान, मंगळवारी परदेशी संस्थात्मक गुंतवणूकदारांनी (FIIs) भारतीय शेअर बाजारात 1,593.53 कोटी रुपयांची निव्वळ खरेदी केली. मागील सत्रात सेन्सेक्स 286.98 अंकांनी वाढून 77,656.09 वर, तर निफ्टी 115.50 अंकांनी वाढून 24,334.55 वर बंद झाला होता.