Stock Market : भू-राजकीय तणाव आणि कच्च्या तेलाच्या वाढलेल्या किमतींचा परिणाम सोमवारी भारतीय शेअर बाजारावर दिसून आला. सुरुवातीला सकारात्मक वाटचाल करणारे बाजार निर्देशांक दिवसअखेर घसरणीसह बंद झाले. अमेरिकेकडून इराणवर नव्या निर्बंधांची शक्यता असल्याने गुंतवणूकदार सावध राहिले.

30 शेअर्सचा बीएसई सेन्सेक्स 171.72 अंकांनी म्हणजेच 0.22 टक्क्यांनी घसरून 77,369.11 अंकांवर बंद झाला. दिवसभरात सेन्सेक्स 339.17 अंकांनी घसरून 77,201.66 अंकांपर्यंत खाली आला होता.

एनएसई निफ्टी 32.95 अंकांनी म्हणजेच 0.14 टक्क्यांनी घसरून 24,219.05 अंकांवर स्थिरावला.

सेन्सेक्समधील अदानी पोर्ट्स, भारत इलेक्ट्रॉनिक्स, बजाज फायनान्स, बजाज फिनसर्व्ह, ट्रेंट, अॅक्सिस बँक, स्टेट बँक ऑफ इंडिया आणि टाटा कन्सल्टन्सी सर्व्हिसेस हे प्रमुख घसरणारे शेअर्स ठरले. तर टाटा स्टील, एचसीएल टेक, इन्फोसिस आणि हिंदुस्थान युनिलिव्हर यांच्या शेअर्समध्ये वाढ झाली.

गुंतवणूकदारांचे ₹1.13 लाख कोटी बुडाले –

बीएसईवर लिस्टेड सर्व कंपन्यांचे एकूण बाजार भांडवल 21 ऑगस्ट रोजी ₹4,93,11,884.223 कोटी होते. सोमवारी ते घटून ₹4,91,98,726.52 कोटी झाले. त्यामुळे एका दिवसात गुंतवणूकदारांच्या संपत्तीत ₹1,13,157.703 कोटींची घट झाली.

दरम्यान, आंतरराष्ट्रीय बाजारातील कच्च्या तेलाचा बेंचमार्क ब्रेंट क्रूड 1.68 टक्क्यांनी घसरून 92.80 डॉलर प्रति बॅरलवर आला. मात्र, इराणच्या तेलपुरवठ्यावर निर्बंध येण्याची शक्यता आणि स्ट्रेट ऑफ हॉर्मुझमधील तणावामुळे तेलाचे दर 90 डॉलरच्या वरच राहिले.

एनरिच मनीचे CEO पोनमुडी आर. यांच्या मते, मध्यपूर्वेतील वाढता तणाव आणि बँकिंग व वित्तीय शेअर्समधील विक्रीमुळे बाजाराच्या भावनेवर दबाव आला. अमेरिकेकडून इराण आणि त्याच्या व्यापार भागीदारांवर नव्या निर्बंधांची घोषणा होण्याची शक्यता असून, त्याला प्रत्युत्तर म्हणून इराणने आखाती देशांमधील तेल निर्यात थांबवण्याची धमकी दिल्याने गुंतवणूकदारांमध्ये चिंता वाढली आहे.

आशियाई बाजारातही मोठी घसरण झाली. दक्षिण कोरियाचा कोस्पी 3.12 टक्क्यांनी घसरला, तर जपानचा निक्केई 225, शांघाय एसएसई कंपोझिट आणि हाँगकाँगचा हँगसेंग निर्देशांकही लाल रंगात बंद झाले.

जिओजित इन्व्हेस्टमेंट्सचे रिसर्च प्रमुख विनोद नायर यांनी सांगितले की, अमेरिकेच्या इराणवरील नव्या निर्बंधांची प्रतीक्षा असल्याने बाजारात सावध वातावरण होते. युरोपीय बाजार मिश्र स्थितीत व्यवहार करत होते, तर शुक्रवारी अमेरिकन बाजार तेजीसह बंद झाले होते.

दरम्यान, शुक्रवारी परदेशी संस्थात्मक गुंतवणूकदारांनी (FIIs) 542.71 कोटी रुपयांच्या शेअर्सची विक्री केली होती. शुक्रवारी सेन्सेक्स 3.11 अंकांनी वाढून 77,540.83 अंकांवर, तर निफ्टी 20.15 अंकांनी म्हणजेच 0.08 टक्क्यांनी वाढून 24,252 अंकांवर बंद झाला होता.