प्रभात वृत्तसेवा
पुणे : पुणे ग्रँड चॅलेंज टूर सायकल स्पर्धेचा उद्या, शुक्रवारी समारोप होत असल्याने मध्यभागातील वाहतुकीत बदल केले आहेत. शुक्रवारी महापालिकेच्या हद्दीतील सर्व सरकारी, खासगी शाळा शुक्रवारी दुपारी बारापर्यंत सुरु ठेवाव्यात. त्यानंतर बंद ठेवाव्या असे आदेश जिल्हाधिकारी जितेंद्र डुडी यांनी दिले आहेत.स्पर्धेच्या अखेरच्या टप्प्यात ९९ किलोमीटर मार्गावर शर्यत होणार आहे. बालेवाडीतील श्री शिव छत्रपती क्रीडा संकुल येथून स्पर्धेचा प्रारंभ होईल.

तेथून पाषाणमार्गे एनसीएल, रक्षक चौक, काळेवाडी फाटा, डांगे चौक, संत तुकाराम महाराज पूल, भक्ती शक्ती चौक, त्रिवेणीनगर, तापकीर चौक, काळेवाडी फाटा, आचार्य आनंदऋषीजी चौक (सावित्रीबाई फुले पुणे विद्यापीठ चौक) सेनापती बापट रस्ता, बालभारती, नळस्टाॅप, लक्ष्मीनारायण चौक, सेव्हन लव्हज चौक,

लष्कर परिसर टर्फ क्लब, साधू वासवानी चौक, साखर संकुल मार्गे जंगली महाराज रस्त्यावरील झाशीची राणी चौक येथे येईल. येथे स्पर्धेचा समारोप होईल अशी माहिती वाहतूक शाखेचे पोलीस उपायुक्त हिंमत जाधव यांनी दिली.बालेवाडीतील राधा चौक ते सुस खिंड, पाषाण चौक, सावित्रीबाई फुले पुणे विद्यापीठ, सेनापती बापट रस्ता,

पत्रकार भवन, विधी महाविद्यालय रस्ता, नळस्टॉप, सेनादत्त पेठ, टिळक चौक, अप्पा बळवंत चौक, दगडूशेठ हलवाई, मंडई, राष्ट्रभूषण चौक, ना. सी. फडके चौक, नरपतगिरी चौक,आंबेडकर पुतळा चौक, लष्कर भागातील अर्जुन चौक ते घोरपडी परिसर, लाल महाल, स. गो. बर्वे चौक (माॅडर्न कॅफे), गरवारे चौक, जंगली महाराज हे रस्ते वाहतुकीस बंद असतील.

सायकल स्पर्धा शुक्रवारी दुपारी बारा ते चार असून स्पर्धेचा मार्ग टप्याटप्याने बंद असेल. कोणताही रस्ता अर्ध्या तासांहून जास्त वेळ बंद ठेवण्यात येणार नाही. स्पर्धेच्या मार्गावर दुतर्फा वाहने बंदी आहे. शहरात जड वाहनांना प्रवेश बंद असेल. रुग्णवाहिकांना त्वरीत मार्ग दिला जाईल. स्पर्धा मार्गस्थ झाल्यानंतर पाठीमागील रस्ते वाहतुकीस खुले होतील, असे अतिरिक्त पोलीस आयुक्त मनोज पाटील यांनी सांगितले.

“पुणे ग्रँड चॅलेंज टूर सायकल स्पर्धेमुळे शहराच्या नावलौकिकात भर पडली आहे. परदेशातील सायकलपटू या स्पर्धेत सहभागी झाले आहेत. नागरिकांनी स्पर्धेकांना उस्फूर्त प्रतिसाद दिला आहेे.”
– रंजनकुमार शर्मा, सहपोलीस आयुक्त, पुणे