पिंपरी : – विद्यार्थ्यांच्या आरोग्याच्या दृष्टीने शाळांच्या परिसरात जंकफूडच्या विक्रीवर निर्बंध असतानाही प्रत्यक्षात मात्र या नियमांना हरताळ फासला जात असल्याचे चित्र आहे.

पिंपरी-चिंचवड शहरातील अनेक शाळांच्या प्रवेशद्वाराजवळच विविध प्रकारचे खाद्यपदार्थ विक्रीसाठी उपलब्ध होत असल्याने विद्यार्थ्यांच्या आरोग्याचा प्रश्न ऐरणीवर आला आहे. शाळेच्या परिसरात जंकफूडची विक्री रोखण्याबाबत नियम असले, तरी त्यांची प्रभावी अंमलबजावणी होत नसल्याने पालकांकडून नाराजी व्यक्त होत आहे.

शाळेत जाणाऱ्या विद्यार्थ्यांना आकर्षित करण्यासाठी प्रवेशद्वाराजवळच वेफर्स, चिप्स, चॉकलेट, बिस्किटे, पेस्ट्री, शीतपेयांसह विविध प्रकारचे खाद्यपदार्थ विक्रीस ठेवले जातात. काही ठिकाणी हातगाड्या, छोटे स्टॉल आणि फिरते विक्रेते शाळा सुटण्याच्या वेळेत गर्दी करतात. त्यामुळे शाळेतून बाहेर पडताच विद्यार्थ्यांचा मोर्चा या पदार्थांकडे वळतो.

शाळेच्या प्रवेशद्वारापासून काही अंतरावरच खाद्यपदार्थांची दुकाने किंवा हातगाड्या उभ्या राहत असल्याने नियमांचा उद्देशच फोल ठरत आहे. विद्यार्थ्यांना पौष्टिक आहाराची सवय लागावी, यासाठी शाळा आणि पालकांकडून प्रयत्न केले जात असताना शाळेच्या बाहेर मात्र प्रक्रिया केलेले आणि कमी पोषणमूल्य असलेले पदार्थ सहज उपलब्ध होत आहेत.

या पदार्थांवर बंदी
– वेफर्स, चिप्स, फ्रेंच फ्राइज
– पेस्ट्री, बिस्किटे, केक
– चॉकलेट, मिठाई व साखरयुक्त पदार्थ
– शीतपेयांसह इतर आरोग्यास अपायकारक खाद्यपदार्थ
– जास्त मीठ, साखर व चरबी असलेले प्रक्रिया केलेले पदार्थ

अशा पदार्थांच्या अतिसेवनामुळे विद्यार्थ्यांच्या आरोग्यावर विपरीत परिणाम होण्याची शक्यता असते. लहान वयातच अशा पदार्थांची सवय लागल्यास भविष्यात लठ्ठपणा, मधुमेह तसेच इतर जीवनशैलीशी संबंधित आजारांचा धोका वाढू शकतो. त्यामुळे शाळांच्या परिसरातील खाद्यपदार्थांच्या विक्रीवर नियंत्रण ठेवणे आवश्यक आहे.

एफडीएच्या कारवाईकडे लक्ष
शाळांच्या परिसरातील खाद्यपदार्थांच्या विक्रीबाबत अन्न व औषध प्रशासन अर्थात एफडीएकडूनही पाहणी कधी केली जाणार ? शाळांच्या परिसरात अशा पदार्थांची विक्री सुरूच राहत असल्याने या परिस्थितीत कितपत बदल होतो, याकडे पालकांचे लक्ष लागले आहे. विद्यार्थ्यांच्या आरोग्याच्या दृष्टीने संबंधित यंत्रणांनी नियमित तपासणी करून नियमांचे उल्लंघन होणार नाही, याची दक्षता घेणे आवश्यक आहे.

नियम केवळ कागदावर नकोत
पिंपरी-चिंचवडमध्ये मोठ्या संख्येने शाळा असून दररोज हजारो विद्यार्थी शाळांमध्ये ये-जा करतात. त्यामुळे शाळांच्या परिसरातील खाद्यपदार्थ विक्रीवर नियमित देखरेख ठेवण्याची गरज आहे. संबंधित विभागांनी शाळांच्या प्रवेशद्वारापासून परिसराची तपासणी करून नियमांचे उल्लंघन करणाऱ्या विक्रेत्यांवर कारवाई करावी, अशी मागणी पालकांकडून होत आहे.

विद्यार्थ्यांच्या आरोग्याच्या दृष्टीने केवळ बंदीचे आदेश काढून उपयोग नाही. शाळा, महापालिका प्रशासन, एफडीए, पालक आणि विक्रेते यांनी एकत्रितपणे जबाबदारी स्वीकारून त्याची काटेकोर अंमलबजावणी करणे गरजेचे आहे. अन्यथा ‘जंकफूडमुक्त शाळा’ ही संकल्पना कागदावरच राहण्याची शक्यता आहे.

PMP passes: ज्येष्ठांना पीएमपी पास मध्ये ५० टक्के सवलत; संचालक मंडळाची मान्यता