पिंपरी– पुणे, पिंपरी-चिंचवडमधील ६० वर्षांवरील ज्येष्ठ नागरिकांना पीएमपीएमएलच्या पासमध्ये ५० टक्के सवलत देण्याच्या निर्णयाला संचालक मंडळाने सोमवारी मान्यता दिली. यामुळे ज्येष्ठांना अवघ्या ३५ रुपयांत दैनिक पास मिळेल. याची अंमलबजावणी तातडीने होणार आहे.

स्थायी समिती अध्यक्ष श्रीनाथ भिमाले यांनी सादर केलेल्या महापालिकेच्या अंदाजपत्रकात ज्येष्ठ नागरिकांसाठी पीएमपी पासमध्ये ५० टक्के सवलतीची घोषणा केली होती. ही घोषणा आता प्रत्यक्षात अंमलात येईल.

पीएमपीएमएलच्या दैनिक पासचा मूळ दर ७० रुपये आहे. त्यापैकी ५० टक्के म्हणजेच ३५ रुपये ज्येष्ठ नागरिकांकडून, तर उर्वरित ३५ रुपयांचा भार पुणे आणि पिंपरी-चिंचवड महापालिकांकडून अनुदानाच्या माध्यमातून उचलला जाईल. पीएमपीएमएलच्या संचालन हद्दीतील सर्व मार्गांसाठी ही सवलत आहे.

ज्येष्ठ नागरिकांना सन्मानाने आणि सुलभतेने सार्वजनिक वाहतूक उपलब्ध व्हावी, या उद्देशाने ही योजना महत्त्वाची आहे. विशेषतः नियमित कामानिमित्त, आरोग्यविषयक कारणांसाठी किंवा अन्य दैनंदिन गरजांसाठी पीएमपीने प्रवास करणाऱ्या ज्येष्ठ नागरिकांना याचा थेट फायदा होणार आहे.

या निर्णयाची अंमलबजावणी करण्यासाठी पीएमपीएमएलच्या ई-तिकीट प्रणालीमध्ये आवश्यक बदल करण्यात येणार आहेत. पीएमपीएमएलचे अध्यक्ष व व्यवस्थापकीय संचालक महेश आहेर यांच्या स्वाक्षरीने याबाबतचा आदेश जारी करण्यात आला आहे.

Parenting tips : मुलांच्या प्रत्येक हट्टाला ‘हो’ म्हणणे ठरतेय घातक! नकार पचवण्याची क्षमता हरवतेय