बुलढाणा – महाराष्ट्रात उन्हाचा पारा चढत असताना विदर्भात उष्णतेची लाट तीव्र झाली आहे. बुलढाणा जिल्ह्यातील शेगाव येथे कडक उन्हामुळे एका 12 वर्षीय शाळकरी मुलाचा उष्माघाताने मृत्यू झाल्याची दुर्दैवी घटना घडली आहे. या घटनेने जिल्हा प्रशासन खडबडून जागे झाले असून, नागरिकांना खबरदारीच्या सूचना देण्यात येत आहेत. दरम्यान, नंदुरबारमध्ये तापमान 43 अंश सेल्सियसवर पोहोचले असून, नागरिक हैराण झाले आहेत.

बुलढाण्यातील हृदयद्रावक घटना
शेगाव येथील संत गजानन महाराज ज्ञानपीठ शाळेत इयत्ता सहावीत शिकणारा 12 वर्षीय संस्कार सोनटक्के याला कडक उन्हामुळे त्रास जाणवू लागला. पालकांनी त्याला तातडीने अकोल्यातील खासगी रुग्णालयात दाखल केले, परंतु उपचारादरम्यान त्याचा मृत्यू झाला. अकोला जिल्हा शल्य चिकित्सकांनी बुलढाणा प्रशासनाला याची माहिती दिली. या घटनेमुळे शालेय विद्यार्थ्यांच्या सुरक्षिततेबाबत प्रश्न उपस्थित झाले आहेत.

विदर्भ-मराठवाड्यात उष्णतेचा तडाखा
राज्यातील अनेक जिल्ह्यांमध्ये तापमानाने चाळीशी ओलांडली आहे. सोलापूरने 42 अंश सेल्सियस गाठले असताना, नंदुरबारमध्ये पारा 43 अंशांवर पोहोचला आहे. बुलढाण्यातही उष्णतेच्या झळा तीव्र झाल्या असून, नागरिकांना विशेषत: दुपारच्या वेळी घराबाहेर पडणे कठीण झाले आहे. सकाळी लवकर किंवा सायंकाळी ऊन कमी झाल्यावरच लोक बाहेर पडणे पसंत करत आहेत.

जिल्हा प्रशासनाच्या उपाययोजना
उष्णतेच्या पार्श्वभूमीवर बुलढाणा प्रशासनाने तातडीच्या उपाययोजना सुरू केल्या आहेत. शाळा सकाळच्या सत्रात भरवण्याचे निर्देश देण्यात आले आहेत. जिल्हा रुग्णालयात उष्माघातासाठी विशेष कक्ष स्थापन करण्यात येत आहे. नागरिकांना दुपारच्या वेळी घराबाहेर न पडण्याचे आणि पुरेसे पाणी पिण्याचे आवाहन करण्यात आले आहे.

नागरिकांमध्ये चिंता
एप्रिलच्या सुरुवातीपासूनच तापमानात झालेली वाढ आणि विद्यार्थ्याच्या मृत्यूच्या घटनेमुळे नागरिकांमध्ये चिंता पसरली आहे. प्रशासनाने अधिक प्रभावी उपाययोजना राबवाव्यात, अशी मागणी होत आहे. उष्णतेच्या लाटेपासून बचावासाठी नागरिकांना सतर्क राहण्याचा सल्ला देण्यात आला आहे.