School Roof Collapse – नवीन शैक्षणिक वर्षाची सुरुवात अवघ्या काही तासांवर आली असताना इंदापूर तालुक्यातील भरतवाडी येथील जिल्हा परिषद प्राथमिक शाळेची अत्यंत गंभीर आणि धोकादायक अवस्था समोर आली आहे. पहिली ते चौथीपर्यंतचे वर्ग असलेल्या या शाळेतील एका वर्गखोलीचा स्लॅब मधोमध कोसळला असून दुसऱ्या वर्गखोलीतील प्लास्टरही मोठ्या प्रमाणात फुगले आहे. त्यामुळे सोमवारपासून (दि. १५) शाळा सुरू होत असताना विद्यार्थ्यांच्या सुरक्षिततेचा प्रश्न ऐरणीवर आला आहे.

शाळेचे मुख्याध्यापक दिलीप राऊत यांनी दोन दिवसांपूर्वी स्वच्छतेसाठी वर्गखोल्या उघडल्या तेव्हा हा प्रकार निदर्शनास आला. त्यांनी तातडीने पालक, ग्रामस्थ आणि स्थानिक नागरिकांना बोलावून प्रत्यक्ष परिस्थिती दाखवली. तसेच शिक्षणाधिकारी व संबंधित विभागाच्या अभियंत्यांनाही याबाबत लेखी माहिती दिली आहे. मात्र, अद्याप प्रशासनाकडून कोणतीही हालचाल झालेली नाही.

१५ वर्षांतच इमारतीची दुरवस्था
या शाळेच्या इमारतीचे बांधकाम अवघ्या १५ ते १८ वर्षांपूर्वी झाले होते. मात्र, निकृष्ट दर्जा किंवा देखभालीअभावी स्लॅबमधील लोखंडी सळ्या गंजून कमकुवत झाल्या आहेत. अनेक ठिकाणी काँक्रीटचे थर निखळून पडत असून पावसाळ्यामुळे परिस्थिती आणखी गंभीर बनली आहे.

स्लॅब कोसळल्यानंतरही लोकप्रतिनिधी गप्प का?
भरतवाडी शाळेची दुरवस्था झाली असताना या भागाचे प्रतिनिधित्व करणारे जिल्हा परिषद सदस्य, शिक्षण समितीचे पदाधिकारी आणि प्रशासन अद्याप सुस्त आहे. ग्रामीण भागातील विद्यार्थ्यांना सुरक्षित शैक्षणिक वातावरण देणे ही लोकप्रतिनिधींची नैतिक जबाबदारी आहे. निवडणुकीत लाखो रुपयांच्या विकासकामांचे दावे करणाऱ्यांना या चिमुरड्यांचा जीव दिसत नाही का? स्लॅब कोसळल्यानंतरही लोकप्रतिनिधींचे डोळे उघडत नसतील,

तर प्रशासन आणखी कोणत्या मोठ्या दुर्घटनेची वाट पाहत आहे? असा संतप्त सवाल ग्रामस्थांमधून उपस्थित केला जात आहे. संबंधित जिल्हा परिषद सदस्यांनी तातडीने पुढाकार घेऊन नवीन स्लॅब, दुरुस्ती आणि पर्यायी शिक्षण व्यवस्थेसाठी निधी उपलब्ध करून देण्याची गरज व्यक्त होत आहे.