Hindi Language Decision Maharashtra : त्रिभाषा सूत्राची अंमलबजावणी करण्यावर शालेय शिक्षण विभाग ठाम असून आता याबाबत एक महत्वाची बातमी समोर आली आहे. तिसरी भाषा म्हणून साधारण हिंदी भाषेसह वेळापत्रकात तृतीय भाषा म्हणून इतर भारतीय भाषांचा पर्याय वेळापत्रक जाहीर करण्यात आले आहे. या नव्या वेळापत्रकात अनेक बदलही करण्यात आले आहेत.

तिसऱ्या भाषेसाठी अद्याप पाठ्यपुस्तके उपलब्ध झालेली नाही, शिक्षकही नाहीत मग वेळापत्रकाची घाई का असा सवाल आता विचारला जात आहे. तसेच तिसऱ्या भाषेसाठी इतर विषयांचे तास कमी करण्यात आल्याची माहिती समोर आली आहे. राज्य शैक्षणिक संशोधन आणि प्रशिक्षण परिषदेने शासन निर्णय जाहीर होताच दुसऱ्या दिवशी इयत्ता पहिलीसाठीचे वेळापत्रक जाहीर केले आहे.

मराठी माध्यमांच्या शाळांचे वेळापत्रक तयार करताना प्रथम भाषा मराठी, द्वितीय भाषा इंग्रजी, तृतीय भाषा हिंदी किंवा त्याला पर्याय म्हणून इतर भारतीय भाषेचा पर्याय असणार आहे, याशिवाय गणित, कलाशिक्षण, आरोग्य व शारीरिक शिक्षण, कार्यशिक्षण या विषयांचाही त्यात समावेश असणार आहे.

तर दुसरीकडे इंग्रजी माध्यमाच्या शाळांमध्ये प्रथम भाषा इंग्रजी, द्वितीय भाषा मराठी, तृतीय भाषा सर्वसाधारणपणे हिंदी किंवा इतर भारतीय भाषा असा पर्याय असणार आहे. याशिवाय गणित, कलाशिक्षण, आरोग्य व शारीरिक शिक्षण, कार्यशिक्षण या विषयांचा देखील समावेश असणार आहे.

नव्या वेळापत्रकात ३५ मिनिटांची तासिका

तिसरी भाषा शिकण्यासाठी कलाशिक्षण, आरोग्य व शारीरिक शिक्षण, कार्य शिक्षणाचे तास कमी केल्याची देखील माहिती समोर आली आहे. जुन्या वेळापत्रकानुसार प्रत्येक विषयासाठी सर्वसाधरणपणे ४५ ते ६० मिनिटांचे तास त्या विषयासाठी दिला जातो. आता नव्या वेळापत्रकात ३५ मिनिटांची तासिका करण्यात आली आहे. इयत्ता पहिलीसाठी हे वेळापत्रक लागू होईल, तर दुसरीसाठी नवीन पाठ्यपुस्तके आल्यानंतर हे वेळापत्रक लागू होणार आहे.

हेही वाचा: ब्रिटिश पंतप्रधान चुकून अनुवादकाला कोरियन राष्ट्राध्यक्ष समजले, हस्तांदोलनही केलं ; G7 शिखर परिषदेत उडाला गोंधळ