Sayaji Shinde: मराठीसह हिंदी आणि दाक्षिणात्य चित्रपटसृष्टीत आपला ठसा उमटवणारे ज्येष्ठ अभिनेते सयाजी शिंदे यांचा नुकताच ६६ वा वाढदिवस मोठ्या उत्साहात साजरा करण्यात आला. अभिनयासोबतच राज्यभरात लाखो झाडं लावून ‘ट्रीमॅन’ म्हणून ओळख मिळवलेल्या सयाजी शिंदेंसाठी वाढदिवसानिमित्त त्यांच्या आईचं एक भावनिक पत्र वाचण्यात आलं. हे पत्र ऐकून कार्यक्रमातील उपस्थितांसह अनेकांच्या डोळ्यांत पाणी आलं. पिंपरी-चिंचवड येथे उपमुख्यमंत्री अजित पवार यांच्या उपस्थितीत आयोजित वाढदिवस कार्यक्रमात मराठी अभिनेता सागर कारंडे यांनी लेखक अरविंद जगताप यांनी लिहिलेलं पत्र वाचून दाखवलं. पत्राची सुरुवात “प्रिय सयाजी… ओळखलं? सैजा म्हटलं असतं तर लगेच ओळखलं असतं” अशा प्रेमळ संबोधनाने होते. आईने पत्रात आपल्या मुलाच्या बालपणापासून ते मोठ्या पडद्यावरील प्रवासापर्यंतच्या आठवणी उलगडल्या. कॉलेजपासून आशीर्वाद देत आलेली ती म्हणते, “तू अजून म्हातारा झालास नाहीस, हळूहळू हो… माझ्यासाठी तू नेहमीच हिरो होतास आणि आहेस. सिनेमात तू व्हिलन असलास तरी आईच्या नजरेत नेहमी हिरोच राहिलास.” तिने सिनेमातील प्रसंग आठवत लिहिलं, “एका चित्रपटात हिरोनं तुझी कॉलर पकडली तेव्हा मी टॉकीजमध्ये शिव्या दिल्या होत्या. जगात व्हिलन जिंकतात, मग सिनेमातही का नाही दाखवत? पण असू दे… प्रेक्षकांच्या चेहऱ्यावर हास्य आणणं, ही पुण्याची गोष्ट आहे आणि तू ती केलंस.” आईने लिहिलं, “तुझा बाप पाखरांसाठी कणीस टाकायचा, त्याच्या पोराचं काही वाईट होणार नाही” अशी भावना तिने मांडली. पत्रात तेलुगू चित्रपटातील कामाचा उल्लेख करताना ती म्हणते, “तेलुगू माणसांनी तुला देव बनवलं, लोक पाया पडत होते. तेव्हा वाटलं, साक्षात तुकाराम महाराज माझ्या पोटाला जन्माला आले.” तसेच, “लेकरू झालं म्हणून बाई आई होत नाही, पण मोठेपणी मुलाने आईचे लाड केल्यावर ती खरी आई होते” असा जीवनाचा अनुभवही तिने शेअर केला. सयाजी शिंदेंच्या झाड लागवडीच्या कार्याचा गौरव करताना ती लिहिते, “चाळीस देवराया उभ्या केल्यास, दहा लाख झाडं लावलीस. रायगड-राजगड पाहून जिजाऊंना जसा शिवरायांचा अभिमान वाटला, तसा मला माझ्या सयाजीचा वाटतो.” पत्राच्या शेवटी ती अभिमानाने म्हणते, “कधी छत्रपती शिवाजी महाराजांचं दर्शन झालं, तर त्यांना सांगेन, महाराज, माझ्यापोटी तुमचा मावळा जन्मलाय, नाव सयाजी. त्याला आशीर्वाद द्या. असाच मावळा राहा आणि जेव्हा होशील तेव्हा खूप म्हातारा हो.” सयाजी शिंदेंसाठी आईचं हे हृदयस्पर्शी पत्र ऐकून उपस्थित प्रेक्षक भावुक झाले, तर सोशल मीडियावरही या पत्राची चर्चा होत आहे. त्यांच्या आईने मांडलेली मुलावरील माया आणि अभिमानाने पुन्हा एकदा “आई” या नात्याचं अनोखं सौंदर्य सगळ्यांच्या मनात घर केलं.
