Sushma Andhare | Sayaji shinde | Sayaji Shinde : विधानसभा निवडणुकीच्या पार्श्वभूमीवर राज्यात राजकीय घडामोडींना वेग आला आहे. अशातच प्रसिद्ध अभिनेते सयाजी शिंदे यांनी राष्ट्रवादी काॅंग्रेसमध्ये (अजित पवार) प्रवेश केला आहे. उपमुख्यमंत्री अजित पवार यांची आज मुंबईत पत्रकार परिषद पार पडली. या पत्रकार परिषदेमध्ये राष्ट्रवादी काँग्रेस (अजित पवार) पक्षाचे प्रदेशाध्यक्ष सुनील तटकरे, प्रफुल्ल पटेल आणि छगन भुजबळ यांच्या उपस्थितीत अभिनेते सयाजी शिंदे यांनी राष्ट्रवादी काँग्रेस (अजित पवार) पक्षात जाहीर पक्ष प्रवेश केला. अभिनेते सयाजी शिंदे हे आता पक्षाचे स्टार प्रचारक म्हणून काम करणार आहेत. विशेष म्हणजे सयाजी शिंदे यांनी अजित पवार गटात प्रवेश केल्याने अनेकांच्या भुवया उंचावल्या आहेत. शिवसेनेच्या उपनेत्या सुषमा अंधारे यांनीही सयाजी शिंदेंचा एक व्हिडिओ शेअर करत त्यांच्यावर टीका केली. तसेच, सयाजी शिंदेंनी गुलीगत धोका दिलाय, असेही त्यांनी म्हटलं होतं. आता, सुषमा अंधारेंच्या टीकेला सयाजी शिंदेंनी प्रत्युत्तर दिलंय. मी सुषमा अंधारे यांना विचारून निर्णय घेत नाही. मला जे माझे निर्णय वाटले ते मी घेतले आहेत. त्यांना ते चुकीचं वाटलं तर त्यांना धन्यवाद, अशा शब्दात त्यांनी सुषमा अंधारेंवर पलटवार केलाय. सुषमा अंधारे काय म्हणतात पाहा…. https://www.facebook.com/reel/1001941155068824 पक्षप्रवेशावर बोलताना सुषमा अंधारे यांनी म्हंटले की, ‘कायम खलनायक भूमीका करणारे सयाजी शिंदे आमच्यासाठी नायक होते. मात्र, आता खलनायकी विचारधारेसोबत गेले, त्यांनी गुलिगत धोका दिला, असे म्हणत सुषमा अंधारेंनी टीका केल होती. तसेच, सयाजी शिंदेंचा एक जुना व्हिडिओदेखील शेअर केला होता. काय म्हणाले सयाजी शिंदे मी सुषमा अंधारे यांना विचारून निर्णय घेत नाही. मला जे माझे निर्णय वाटले ते मी घेतले आहेत. त्यांना ते चुकीचं वाटलं तर त्यांना धन्यवाद, अशा शब्दात सयाजी शिंदेंनी सुषमा अंधारेंच्या टीकेवर पलटवार केलाय. सध्या खूप जण प्रतिक्रिया देत आहेत, आता या सगळ्यांवर मी प्रतिक्रिया द्यायला हवी असं काही नाही. मला जी भूमिका पटली ती मी घेतली आता काही जणांना ती खलनायकी वाटत असेल त्याकडे मी लक्ष देणार नाही. यात न पडलेलं बरं, वयाची पासष्टी आली आहे. आतापर्यंतचे माझे निर्णय मीच घेतलेले आहेत, मी घेतलेला निर्णय योग्य आहे हे तुम्हा सर्वांना लवकरच कळेल, असेही सयाजी शिंदे यांनी म्हटले. सयाजी शिंदे पक्षाचे स्टार प्रचारक – अजित पवार अजित पवार म्हणाले, “मी चित्रपट पाहत नाही पण सयाजीराव यांचे अनेक चित्रपट बघितले आहेत. त्यांच्या कारकिर्दीत अनेक सामाजिक कामात त्यांची माझी भेट झाली. मुळात सयाजीरावांना झाडाची आवड आहे. सह्याद्री देवराईच्या माध्यमातून राज्यभर वृक्षारोपण करतात. त्यांचं मोठं काम आहे. साईबाबांचा प्रसाद, सिद्धीविनायक बाप्पाचा प्रसाद दिला जातो तसा प्रसाद म्हणून रोपटं दिलं जावं असं आम्हाला त्यांनी सांगितलं. अशा विषयावर चर्चा करत असतो. सयाजीराव राज्यभर पक्षाचे स्टार प्रचारक म्हणून काम करतील”, अशी घोषणा अजित पवारांनी यावेळी केली.
