Satya Movie Rerelease Date Announced : मागील काही महिन्यांमध्ये जुन्या चित्रपटांना पुन्हा रिलीज करण्याचा ट्रेंड वाढला आहे. ‘मैने प्यार किया’, ‘कल हो ना हो’, ‘करण अर्जुन’ ‘तुंबाड’, ‘गँग्स ऑफ वासेपूर’, ‘दिलवाले दुल्हनिया ले जायेंगे’ सारखे अनेक चित्रपटवर पुन्हा रिलीज झाले होते. विशेष म्हणजे हे चित्रपट पाहण्यासाठी प्रेक्षकांनीही थिएटरमध्ये गर्दी केली होती. आता या लिस्टमध्ये ‘सत्या’ या गाजलेल्या चित्रपटाचा समावेश होणार आहे .‘सत्या’ला हिंदीमधील गँगस्टर चित्रपटाचा बेंचमार्क मानले जाते.

राम गोपाल वर्मा दिग्दर्शित व अभिनेता मनोज बाजपेयीची प्रमुख भूमिका असलेला हा चित्रपट प्रेक्षकांना पुन्हा एकदा मोठ्या पडद्यावर पाहता येणार आहे. यापूर्वी 3 जुलै 1998 ला हा चित्रपट रिलीज झाला होता. आता राम गोपाल वर्मा यांनी या चित्रपटाला 17 जानेवारी 2025 ला रि-रिलीज केले जाईल, अशी घोषणा केली आहे. 26 वर्षांनी हा चित्रपट प्रेक्षकांना थिएटरमध्ये पाहता येणार आहे.

सत्या चित्रपटातील मनोज बाजपेयीची भूमिका विशेष गाजली होती. त्याने साकारलेले भीकू म्हात्रे हे पात्र विशेष गाजले या चित्रपटाने त्यावेळी बॉक्स ऑफिसवर 14.35 कोटी रुपयांपेक्षा अधिकची कमाई केली होती. तर चित्रपटाचे बजेट 11 कोटी रुपये होते. हा चित्रपट सध्या ओटीटी प्लॅटफॉर्म प्राइम व्हीडिओ आणि सोनी लिव्हवर देखील पाहण्यासाठी उपलब्ध आहे.

या चित्रपटात मनोज बाजपेयीसोबतच जे.डी. चक्रवर्ती, सौरभ शुक्ला, उर्मिला मातोंडकर आणि आदित्य श्रीवास्तव या कलाकारांच्याही प्रमुख भूमिका आहेत. चित्रपटाची कथा अनुराग कश्यप आणि सौरभ शुक्ला यांनी लिहिली आहे. तर राम गोपाल वर्मा यांनी दिग्दर्शन केले आहे.