Satara: सातारा पालिकेतील भाजप नगरसेवकांमधील अंतर्गत कुरबुरी आणि गटबाजीवर सार्वजनिक बांधकाम मंत्री शिवेंद्रसिंहराजे भोसले यांनी अनोखा ‘स्पोर्ट्स फॉर्म्युला’ सुचवत राजकीय वातावरणात चांगलीच रंगत आणली. सातारा डिस्ट्रिक्ट प्रीमियर लीगच्या उद्घाटनावेळी त्यांनी नगरसेवकांना थेट क्रिकेटच्या मैदानावर उतरवण्याचा सल्ला देत, ‘बनकर साहेब, नगरसेवकांची एक मॅच घ्या. दोन्ही बाजूंचे मिक्स प्लेयर घ्या. वाटलं तर मी आणि उदयनराजे अंपायर म्हणून येतो. कोण आऊट, कोण नॉट आऊट हे आम्ही ठरवतो,’ अशी मिश्किल टिपणी केली.

शाहू स्टेडियममधील सातारा प्रीमियर लीगच्या उद्घाटनाच्या व्यासपीठावर या टिपणीनंतर एकच हास्यकल्लोळ उसळला. नगरसेवक व भाजपचे गटनेते अविनाश दादा कदम मित्र समूहाच्यावतीने या क्रिकेट स्पर्धांचे आयोजन करण्यात आले आहे. व्यासपीठावर शिवेंद्रसिंहराजे यांनी अत्यंत मिश्किलशैलीत जोरदार टोलेबाजी केली. मात्र, या विनोदी शैलीमागे भाजपमधील अंतर्गत तणाव कमी करण्याचा स्पष्ट संदेश दडलेला होता. शिवेंद्रराजेंनी पुढे सांगितले की, ‘मुंबईत खासदार उदयनराजे भोसले यांच्यासोबत परवा चर्चा झाली. तुम्ही आता फक्त आघाड्यांचे नगरसेवक नाही, तर भाजपचे नगरसेवक आहात, असे आम्ही नगरसेवकांना स्पष्ट सांगितले आहे.’

नगरसेवकांनी वैयक्तिक मतभेद विसरून संघभावनेने काम करावे, हा संदेश देताना त्यांनी क्रिकेटचा दाखला दिला. ‘एकत्र खेळल्याने वैरभावना कमी होते आणि सांघिक वृत्ती निर्माण होते. त्यामुळे मैदानावर या, बाकीचा निकाल आम्ही लावतो. कच्चा लिंबू कोण हेही आम्हीच ठरवू,” असे म्हणत त्यांनी उपस्थितांची पुन्हा दाद मिळवली. राजकारणातील तणावाला हलक्याफुलक्या शैलीत उत्तर देण्याची शिवेंद्रसिंहराजेंची ही शैली पुन्हा एकदा चर्चेत आली आहे. विशेष म्हणजे त्यांच्या या ‘क्रिकेट डिप्लोमसी’ला उपस्थित भाजप नगरसेवकांनी जोरदार टाळ्यांच्या गजरात प्रतिसाद दिला. पालिकेतील अंतर्गत वाद मिटवण्यासाठी आता खरोखरच क्रिकेटचा सामना रंगणार का, याची चर्चा राजकीय वर्तुळात सुरू झाली आहे.