प्रभात वृत्तसेवा सातारा ( संदीप राक्षे ) – महाराष्ट्राच्या सत्ताकारणात राजधानी सातारा आपल्या राजकारणाचा रुबाब वेगळ्या पद्धतीने टिकवून आहे. छत्रपती शिवरायांचे थेट वंशज खासदार उदयनराजे भोसले व सार्वजनिक बांधकाम मंत्री शिवेंद्रसिंहराजे भोसले यांच्या राजकीय समीकरणाच्या परिघांमध्ये तिसऱ्या कोणाचा अद्याप अंतर्भाव झालेला नाही. मनोमीलनाची काळजी करु नका, असा कानमंत्र खासदार उदयनराजे यांनी दिल्यापासून दोन्ही आघाड्यांमध्ये राजकीय हालचाल सुरू झाली आहे. जागा वाटपाच्या फॉर्म्युल्याची आता उत्सुकता आहे. सातारा विकास आघाडी व नगर विकास आघाडी या दोन्ही आघाड्यांनी आपापल्या पद्धतीने प्रभागाचा कानाकोपरा पिंजून काढायला सुरुवात केली आहे. भारतीय जनता पक्षाने नगराध्यक्ष भारतीय जनता पक्षाचा आणि निवडणूक पक्ष चिन्हावर असा टोकाचा आग्रह धरल्याने साताऱ्यात भाजपचा दबदबा राहणार हे निश्चित आहे. मात्र, साताऱ्याचे निर्णय होताना दोन्ही राजांना सर्वाधिकार बहाल करण्यात आले आहेत. यामध्ये ज्येष्ठत्वाच्या नात्याने खासदार उदयनराजे भोसले यांच्याकडे अधिकचे माप आहे. तसेच भाजपने जिल्ह्याचे निवडणूक प्रभारी म्हणून शिवेंद्रसिंहराजे भोसले यांची नेमणूक केली आहे. त्यामुळे जिल्ह्याच्या राजकारणात त्यांना लक्ष घालताना साताऱ्यातही स्वतंत्र नजर ठेवावी लागणार आहे. आता मनोमीलनावर बोलू काही.. जागावाटपाच्या फॉर्मुल्याची 25- 25, 28- 22 अशा काही राजकीय अटकळी बांधण्यास सुरुवात झाली आहे. मात्र, गेल्या 24 वर्षांचा शहराचा राजकीय इतिहास पाहिला तर खासदार उदयनराजे भोसले यांची सातारा विकास आघाडी दोन पावले पुढे राहिली आहे. यंदा लोकसभा आणि विधानसभा या दोन्ही निवडणुकांमध्ये साताऱ्यात मनोमीलन दिसून आले. तीच परंपरा सातारा नगरपालिकेच्या निवडणुकीत कायम ठेवायची आहे. उदयनराजे म्हणतात, ‘मनोमिलन आहेच काळजी करु नका,’ तर शिवेंद्रसिंहराजे यांनी पुढील रणनीतीचा निर्णय पक्षश्रेष्ठींकडे सोपवला आहे. पक्षश्रेष्ठींमध्ये अंतिम निर्णय मुख्यमंत्री देवेंद्र फडणवीस यांचा असेल आणि फडणवीस व उदयनराजे यांचे राजकीय सौख्य संपूर्ण महाराष्ट्र पाहतो आहे. उदयनराजे यांचा कोणताही आग्रह फडणवीस यांना टाळता येत नाही. सातारा नगरपालिकेच्या निवडणुकीत नगराध्यक्ष होताना दोन्ही राजांची सहमती आणि कार्यकर्त्यांच्या अंतर्मनाच्या जुळलेल्या तारा हे महत्त्वाचे असणार आहे. शिवेंद्रसिंहराजे भोसले यांनी नगर विकास आघाडीच्या बैठकीत ‘हा आमचा, हा तुमचा’ असे न करता आपण सारे एकच आहोत असे परखडपणे सुनावले आहे. त्यामुळे भाजपचा निष्ठावंत स्वतंत्र, आघाड्यांचे स्वतंत्र नगरसेवक असा कोणताही भेदभाव यंदाच्या निवडणुकीत दिसणार नाही. हा राजकीय एकजिनसीपणा कार्यकर्त्यांमध्ये मुरलेला आहे की नाही हे स्वतंत्ररीत्या शोधावे लागणार आहे. मात्र, दोन्ही राजे लवकरच एकत्र बसून निर्णय घेतील याविषयी राजकीय सूत्रे ठाम आहेत. नगराध्यक्षपदाच्या दावेदारांची चर्चा.. सातारा नगरपालिका ही जिल्ह्यातील एकमेव ‘अ’ वर्ग नगरपालिका असून नगराध्यक्षपद सर्वसाधारण खुल्या गटासाठी आहे. त्यामुळे इच्छु कांच्या आकांक्षांना धुमारे फुटले आहेत. उदयनराजे भोसले यांचे कट्टर समर्थक संग्राम बर्गे, काका धुमाळ, माजी उपनगराध्यक्ष मनोज शेंडे, जिल्हा पतसंस्था फेडरेशनचे माजी चेअरमन व शिवेंद्रसिंहराजे भोसले यांचे कट्टर समर्थक अविनाश कदम, अमोल मोहिते, रवींद्र ढोणे आदी दिग्गज माजी नगरसेवक नगराध्यक्षपदाच्या चर्चेत आहेत. त्याशिवाय दोन्ही राजांना मान्य व दोघांशीही समन्वय साधू शकेल असे भाजपचे निष्ठावंत अमित कुलकर्णी यांचे नावही चर्चेत आहे. नगराध्यक्षपद खुले असल्यामुळे या निवडीमध्ये महिलाही येऊ शकतात, हे कोणीही लक्षात घेत नाही. मात्र, अचानक असे एखादे नावही पुढे येऊ शकते.
