Satara News : वाघोली (ता. कोरेगाव) येथे सार्वजनिक बांधकाम विभागाच्यावतीने गेल्या वर्षभरापासून (Satara News) वसना नदीवरील ब्रिटीशकालीन पुलाचे काम संत गतीने सुरू आहे. वाघोली व परिसरातील गावाकडे जाण्यासाठी जुन्या पुलाच्या समांतर बाजूला पाइप टाकून भराव तयार केला व पर्यायी मार्गाची व्यवस्था केली होती.

मात्र, सोळशी भागात पडणाऱ्या सततच्या पावसामुळे (Satara News) वसना नदी वाहू लागली यामुळे वाघोली येथील पुलावर टाकण्यात आलेला भराव वाहून गेल्याने पुलावरील रस्ता धोकादायक बनला आहे. संभाव्य अपघात टाळण्यासाठी या मार्गावरील वाहतूक तात्पुरती बंद केली असून नागरिकांना पर्यायी मार्गाचा वापर करण्याचे आवाहन करण्यात आले आहे.

मुसळधार पावसामुळे पुलावरील भराव पूर्णपणे पाइपसह वाहून गेल्याने रस्त्याखाली मोठ्या प्रमाणात पोकळी निर्माण झाली आहे. त्यामुळे या मार्गावरून वाहनांची किंवा पादचाऱ्यांची ये-जा करणे अत्यंत धोकादायक ठरत आहे. कोणतीही दुर्घटना घडू नये यासाठी खबरदारीचा उपाय म्हणून हा रस्ता तातडीने बंद केला आहे.

या मार्गाचा वापर करणाऱ्या नागरिकांनी (Satara News) तसेच शेतकरी, विद्यार्थी आणि दैनंदिन प्रवाशांनी पर्यायी रस्त्याचा वापर करून प्रवास करावा, तसेच बंद करण्यात आलेल्या रस्त्यावरून जबरदस्तीने वाहन नेण्याचा प्रयत्न करू नये, असे आवाहन करण्यात आले आहे.

दरम्यान, भराव पुन्हा टाकून रस्ता पूर्ववत करण्यासाठी आवश्यक ती कार्यवाही सुरू करण्यात येणार असल्याची माहिती संबंधित अधिकाऱ्यांनी दिली आहे. दुरुस्तीचे काम पूर्ण होईपर्यंत नागरिकांनी प्रशासनाला सहकार्य करावे आणि स्वतःच्या सुरक्षिततेच्या दृष्टीने पर्यायी मार्गाचाच वापर करावा, असे आवाहन करण्यात आले आहे.