प्रभात वृत्तसेवा
सातारा – बदली झालेल्या शिक्षकांना कार्यमुक्तीचे आदेश दिवाळी सुट्टीनंतर देण्यात येणार असल्याची माहिती प्राथमिकचे शिक्षणाधिकारी अनिस नायकवडी यांनी दिली होती. प्राथमिक शिक्षकांमध्ये मात्र याबाबत उत्सुकता होती. मात्र आता दिवाळी सुट्टीनंतर शाळेच्या पहिल्याच दिवशी बदली झालेल्या शिक्षकांना कार्यमुक्त करण्यात येणार आहे. याबाबतची प्रक्रिया प्राथमिक शिक्षण विभागाकडून राबवण्यात येणार आहे.प्राथमिक शिक्षकांच्या ऑनलाइन बदल्यांची प्रक्रिया पूर्ण होवूनही त्यांना कार्यमुक्त करण्यात येत नसल्याने शिक्षकांमध्ये नाराजी होती.

शिक्षणाधिकारी अनिस नायकवडी यांची भेट शिक्षकांनी ही मागणी लावून धरली होती. मुख्य कार्यकारी अधिकारी याशनी नागराजन यांच्याशी याबाबत चर्चा केल्यानंतर अनिस नायकवडी यांनी एक प्रसिध्दीपत्रक काढून याबाबत स्पष्टीकरण दिले होते. उच्च न्यायालयाच्या निर्णयाच्या अधिन राहून ही कार्यवाही करुन दिवाळी सुट्टीनंतर शिक्षकांना कार्यमुक्त करण्यात येणार असल्याचे शिक्षण विभागाने स्पष्ट केले होते. मात्र याबाबत कार्यवाही होणार की नाही याबाबत शिक्षकांना उत्सुकता होती.

प्राथमिक शिक्षकांना कार्यमुक्त करण्याची प्रक्रिया सुरु असून दिवाळी सुट्टीनंतरच्या पहिल्याच दिवशी बदली झालेल्या शिक्षकांना कार्यमुक्त करण्यात येणार आहे. जे शिक्षक दिव्यांग प्रमाणपत्र, शारीरीक पडताळणी अंती अपात्र, अयोग्य ठरलेले आहेत. अशा १८५ व आरोग्य तपासणीत प्रलंबित असलेल्या शिक्षकांना वगळून ही प्रक्रिया राबवण्यात येणार असल्याची माहिती शिक्षण विभागातून देण्यात आली.

पाच टप्प्यात २०८३ शिक्षकांच्या बदल्या..
प्राथमिक शिक्षकांच्या जिल्हांतर्गत बदल्यांची प्रक्रिया मे २०२५ पासून सुरु आहे. या बदली प्रक्रियेमध्ये संवर्ग एक मध्ये १७४३ शिक्षक पात्र होते. त्यापैकी ४४३ बदल्या झाल्या आहेत. संवर्ग दोनमधून (पती पत्नी एकत्रीकरण) २२४ पैकी २१३, संवर्ग ३ (बदली अधिकारी प्राप्त) ६०१ पैकी २४० बदल्या झाल्या आहेत. बदली पात्र शिक्षक पहिला टप्प १६१० पैकी ११५३ बदल्या झाल्या आहेत. बदली पात्र शिक्षकांच्या दुसऱ्या टप्प्यात ४५७ पैकी ६४ बदल्या झाल्या आहेत. पाच टप्प्यात २०८३ शिक्षकांच्या ऑनलाइन पोर्टलच्या माध्यमातून बदल्या झाल्या आहेत, अशी माहिती प्राथमिक शिक्षणाधिकारी अनिस नायकवडी यांनी दिली.