सातारा  – मुंबईतील आमदार राम कदम यांच्या मतदारसंघात अंगावर कंबल टाकून विकलांग व्यक्तींवर उपचार करणाऱ्या राजस्थानातील कंबलबाबावर जादूटोणा विरोधी कायद्याखाली कारवाई करण्याची मागणी महाराष्ट्र अंधश्रद्धा निर्मूलन समितीने केली आहे.

कंबलबाबा या नावाने ओळखला जाणारा राजस्थानातील एक भोंदू बाबा आमदार राम कदम यांच्या आधाराने त्यांच्या मतदारसंघातील विकलांग लोकांवर कंबल टाकून तथाकथित उपचार करत असल्याचे अनेक व्हिडिओ राम कदम यांच्या फेसबुक वॉलवर बघायला मिळतात. भोंदूबाबा करत असलेल्या या उपचारांच्या वेळी आमदार राम कदम तसेच पोलीस अधिकारी देखील उपस्थित असलेले दिसतात. महाराष्ट्रात जादूटोणा विरोधी कायदा गेली 10 वर्षे अस्तित्वात आहे.

या कायद्यानुसार स्वतःच्या अंगात दैवी शक्ती असल्याचा दावा करणे, चमत्कार करण्याचा दावा करणे हा दखलपात्र व अजामीनपात्र गुन्हा आहे. आजवर जवळपास 1000 पेक्षा अधिक भोंदू बाबांवर या कायद्याच्या अंतर्गत गुन्हे दाखल झालेले आहेत. त्याचप्रमाणे कंबलबाबा या भोंदू बाबावर देखील पोलीसांनी जादूटोणा विरोधी कायद्याच्या अंतर्गत तत्काळ गुन्हा दाखल करावा व पीडित व्यक्तींची क्रूर थट्टा थांबवावी, अशी मागणी महाराष्ट्र अंधश्रद्धा निर्मूलन समितीच्यावतीने मुक्ता दाभोलकर,डॉ. हमीद दाभोलकर, प्रशांत पोतदार, वंदना माने, डॉ. दीपक माने, शशिकांत सुतार, अँड. हौसेराव धुमाळ यांनी केली आहे.