Satara News : महाराष्ट्रात ॲडव्होकेट प्रोटेक्शन ॲक्ट लागू करावा, या प्रमुख मागणीसाठी ॲड. शैलेश निकम आणि सातारा (Satara News) बार असोसिएशनचे सदस्य ॲड. राजेश निकम यांनी सातारा जिल्हाधिकारी कार्यालयासमोर बेमुदत धरणे आंदोलन सुरू केले आहे.

आंदोलनाच्या दुसऱ्या दिवशी या मागणीला संपूर्ण महाराष्ट्रातून पाठिंबा मिळत असून, विविध ठिकाणचे वकील आंदोलनस्थळी भेट देऊन पाठिंब्याची पत्रे देत आहेत. वकिलांच्या सुरक्षिततेसाठी हा कायदा लवकरात लवकर मंजूर करावा, अशी मागणी (Satara News)जोर धरत आहे.

वकिलांवर होणारे हल्ले, धमक्या आणि मारहाणीच्या घटनांच्या पार्श्वभूमीवर वकिलांना कायदेशीर कामकाज निर्भयपणे करता यावे, यासाठी स्वतंत्र संरक्षण कायदा आवश्यक असल्याची भूमिका आंदोलनकर्त्यांनी मांडली आहे. वकिलांचे संरक्षण म्हणजे न्यायव्यवस्थेचे संरक्षण असून, शासनाने या मागणीची तातडीने दखल घ्यावी, असे आवाहन करण्यात येत आहे.

या आंदोलनाला ॲड. उर्मिलाराजे जाधव-पाटील, प्रेसिडेंट, लीगल सेल, महाराष्ट्र — राष्ट्रीय क्षत्रिय जनसंसद, नवी दिल्ली, यांनी जाहीर पाठिंबा दिला आहे. तसेच वकिलांच्या सुरक्षिततेसाठी कार्यरत महालक्ष्मी आधार फाउंडेशनच्या पुढाकाराचेही त्यांनी समर्थन केले आहे.

ॲडव्होकेट प्रोटेक्शन ॲक्ट लागू करण्यासाठी आवश्यक विधिमंडळीय कार्यवाही तातडीने पूर्ण करून वकिलांना कायदेशीर संरक्षण द्यावे, अशी मागणी यावेळी करण्यात आली. महाराष्ट्रभरातून मिळणाऱ्या पाठिंब्यामुळे या आंदोलनाला बळ मिळत असून, शासन या मागणीवर काय भूमिका घेते, याकडे वकील वर्गाचे लक्ष लागले आहे.

वकिलांचा आवाज दुर्लक्षित करू नका; वकिलांचे संरक्षण म्हणजे न्यायाचे संरक्षण! हा संदेश देत ॲड. शैलेश निकम आणि ॲड. राजेश निकम यांनी आपला लढा सुरू (Satara News) ठेवला आहे.