कोयनानगर : पाटण तालुक्यातील पाणीटंचाईवर मात करण्यासाठी प्रस्तावित हुंबरळी पाझर तलाव प्रकल्पाला सुधारित प्रशासकीय मान्यता तातडीने देण्याचे निर्देश जलसंपदा मंत्री राधाकृष्ण विखे-पाटील यांनी दिले. मुंबई मंत्रालयात झालेल्या उच्चस्तरीय बैठकीत मदत व पुनर्वसन मंत्री मकरंद पाटील, पालकमंत्री शंभूराज देसाई आणि जलसंपदा विभागाचे अप्पर मुख्य सचिव दीपक कपूर उपस्थित होते.

या प्रकल्पामुळे हुंबरळी, देशमुखवाडी, तोरणे, पिराजीचीवाडी आणि आणखी दोन गावांना कायमस्वरूपी पाणीपुरवठा होणार आहे. उन्हाळ्यात कोरड्या पडणाऱ्या विहिरी आणि टँकरवरील अवलंबित्वामुळे या गावांना तीव्र पाणीटंचाईला सामोरे जावे लागते. पालकमंत्री शंभूराज देसाई यांच्या सातत्यपूर्ण पाठपुराव्यामुळे हा प्रकल्प शासनाच्या प्राधान्यक्रमात आला असून, मंजुरी प्रक्रियेला गती मिळाली आहे.

“हा प्रकल्प त्वरित प्रत्यक्षात यावा यासाठी सर्व प्रक्रिया जलद गतीने पूर्ण करा,” असे आदेश विखे-पाटील यांनी दिले. दीपक कपूर यांनी अधिकाऱ्यांना सुधारित अंदाजपत्रक आठवड्याभरात सादर करण्यास सांगितले. मकरंद पाटील यांनी पुनर्वसन विभागाकडून पूर्ण सहकार्याची हमी दिली.