Satara News: साताऱ्यात दिवाळीचा जल्लोष उच्चतम कोटीवर आहे. सातारा पालिकेच्या निवडणुकीसाठी इच्छुक असणाऱ्या भावी नगरसेवकांनी दिवाळीनिमित्त संपर्क अभियान सुरू केले आहे .प्रभागातील नागरिकांशी संवाद साधून त्यांच्या अडीअडचणी जाणून घेण्याचा प्रयत्न होत आहे. काम करणाऱ्या नगरसेवकांना संधी देण्याचे सूतोवाच साताऱ्याच्या दोन्ही नेत्यांनी केल्या असल्याने पुन्हा एकदा मेहरबान मंडळी कामाला लागली आहेत.

सातारा नगरपालिकेची निवडणूक दिवाळीनंतर केव्हाही जाहीर होऊ शकते .प्रारूप मतदार याद्या अंतिम झाल्यानंतर नोव्हेंबरच्या पहिल्या आठवड्यामध्ये नगरपालिका निवडणुकांची आचारसंहिता जाहीर होण्याचे संकेत राज्य निवडणूक आयोगाने दिले आहेत .त्या दृष्टीने साताऱ्यात 25 प्रभागातून 50 नगरसेवक निवडून द्यायचे आहेत त्या दृष्टीने भावी नगरसेवकांची तयारी सुरू झाली आहे .सातारा शहराची लोकसंख्या एक लाख 81 हजार 660 इतकी असून पैकी एक लाख 48 हजार हे प्रत्यक्ष मतदान करणार आहे .त्यामुळे दिवाळीनिमित्त सातारकरांशी भावी मेहरबानांच्या गाठीभेटी शुभेच्छा अभियानाच्या निमित्ताने सुरू झाल्या आहेत .

लक्ष्मीपूजन भाऊबीज आणि दिवाळी पाडवा या तीन दिवसांच्या दरम्यान प्रत्येक प्रभागांमध्ये मेहरबान यांनी आपल्या मतदारांना दिवाळीची शुभेच्छापत्रे आणि फराळांचे तत्सम साहित्य पाठवून दिवाळीच्या शुभेच्छा दिल्या आहेत .ज्या नगरसेवकांना लगतच्या प्रभागाचे पर्याय शोधावे लागणार आहेत अशा नगरसेवकांनी प्रभागाच्या नकाशाचा अभ्यास करून त्या दृष्टीने पावले टाकायला सुरुवात केली आहेत लगतच्या प्रभागात नागरिकांच्या आवर्जून भेटीगाठी घेतल्या जात आहेत .उदाहरणार्थ नरक चतुर्दशीच्या मुहूर्तावर रात्री आठ वाजता राजवाडा येथील डीपीला आग लागून सातारा शहरात विशेषता राजवाडा परिसरात अर्धा तास लाईट गेली होती त्यावेळी वीज वितरणच्या तांत्रिक विभागाशी तब्बल चार नगरसेवकांनी लाईट का गेली याची विचारणा केली .ही सतर्कता सातारा पालिका निवडणूक जवळ आल्याचे निदर्शक आहे .

सातारा शहराच्या हद्दवाढ भागातून 10 नगरसेवक निवडून द्यावयाचे आहेत या भागातून 60 हजार मतदारांपैकी 36 हजार मतदार मतदान करणार आहेत. त्यामुळे नवीन भागांमध्ये सुद्धा पहिल्यांदाच नगरसेवक होणाऱ्या भावी नगरसेवकांनी दिवाळी पहाटेचे कार्यक्रमाचे आयोजन करून नागरिकांना आमंत्रित केले आहे. काही नगरसेवकांनी निराधार व गरजू व्यक्तींना दिवाळी फराळाचे वाटप करून आपणही नगरसेवक स्पर्धेत असल्याचे दाखवून दिले आहे.

यंदाची निवडणूक पक्षाच्या नावावर
साताऱ्यात 25 प्रभागातून 50 नगरसेवक निवडून द्यायचे आहेत त्यामध्ये 25 महिला प्रतिनिधी आहेत . या महिला प्रतिनिधी सक्षम सुजाण आणि सभागृहात बोलू शकतील अशा पद्धतीच्या हव्या आहेत. त्यामुळे दोन्ही महाराजांची डोकेदुखी वाढणार आहे. ही सर्व राजकीय गणिते म्हणून मिलन की मैत्रीपूर्ण लढती या पर्यायावर अवलंबून आहेत. मनोमिलनाचा प्रश्न अद्यापही सार्वजनिक बांधकाम मंत्री शिवेंद्रसिंहराजे भोसले यांनी पक्षश्रेष्ठींवर सोपवला आहे. त्यामुळे यंदाची निवडणूक ही पक्षाच्या नावावर लढली जाईल, असे संकेत मिळत आहेत. दोन्ही नेत्यांनी या दोन्ही महत्त्वपूर्ण बाबींवर सूचक मौन बाळगले आहे.

दोन्ही आघाड्यांच्या तंबूमध्ये गर्दी
भाजपचे निष्ठावंत सातारा विकास आघाडी नगर विकास आघाडी यांचे उमेदवार तसेच नव्याने नगरपालिकेत येऊ घालणारे उमेदवार अशी गर्दी दोन्ही आघाड्यांच्या तंबूमध्ये होणार आहे त्यामुळे एकाला संधी देताना दोघांना थांबवावे लागणार आहे. त्यामुळेच बंडखोरीचा भडका कसा शमवता येईल याची रणनीती खासदार उदयनराजे भोसले व सार्वजनिक बांधकाम मंत्री शिवेंद्रसिंहराजे भोसले यांना आखावी लागणार आहे.

हद्दवाढीतील चार प्रभाग महत्त्वाचे ठरणार
सातारा शहरातील शनिवार पेठ व मंगळवार पेठ तसेच हद्दवाढीनंतर नव्याने सामील झालेल्या शाहूपुरी आणि त्या खालोखाल खेड ग्रामपंचायतीतील भाग हे चार प्रभाग महत्त्वाचे ठरणार आहेत. शनिवार पेठ या प्रभागाची मतदार संख्या ही सर्वात जास्त असणार आहे. त्यामुळे या प्रभागातून उभ्या राहणाऱ्या नगरसेवकाला जास्तीत जास्त नागरिकांपर्यंत पोहोचावे लागणार आहे. याशिवाय प्रभाग क्रमांक 11 मध्ये सुद्धा मंगळवार तळे ते धुमाळ आळी ते थेट पेढ्याचा भैरोबा हे प्रभाग परिसर नव्याने जोडले गेल्यामुळे तेथेही नगरसेवकांना मताची बेगमी करावी लागणार आहे. शाहूपुरी हा परिसर हा साधारण पंचवीस हजार पेक्षा अधिक लोकसंख्या असणारा भाग आहे. त्यामुळे येथील पायाभूत सुविधांच्या कामांची बेगमी महत्वाची ठरणार आहे. ही कामे प्रशासक राजवटीत झाली तरी पाठपुरावा नक्की कोणी केला या संदर्भाने सुद्धा भावी मेहेरबानांमध्ये स्पर्धा रंगल्या आहेत. मतदार राजाच्या मर्जीचा अनुभव सिद्ध उमेदवार दोन्ही नेत्यांना प्रत्येक प्रभागातून द्यावा लागणार आहे .