कोयनानगर : येराड (ता. पाटण) येथील जलपर्यटन प्रकल्पाचे काम आता वेग घेऊ लागले असून, हे काम पर्यटन विकासासाठी निर्णायक ठरणार आहे. या प्रकल्पाचे काम दर्जेदार आणि वेळेत पूर्ण करणे अत्यावश्यक असल्याचे निर्देश राज्याचे पर्यटन मंत्री व जिल्ह्याचे पालकमंत्री शंभूराज देसाई यांनी अधिकाऱ्यांना दिले.

पालकमंत्री देसाई यांनी आज येराड येथील जेट्टी (बोट थांबा) प्रकल्पाची पाहणी केली. यावेळी त्यांनी प्रकल्पाचे महत्त्व अधोरेखित करताना, यामुळे स्थानिक पर्यटनाला चालना मिळेल, असे सांगितले. जागतिक पर्यावरण दिनाचे औचित्य साधून त्यांनी जेट्टी परिसरात वृक्षारोपण करत पर्यावरण संवर्धनाचा संदेश दिला.

या दौऱ्यात सार्वजनिक बांधकाम विभागाचे अधीक्षक अभियंता संतोष रोकडे, प्रांताधिकारी सोपान टोम्पे, पाटणचे तहसीलदार अनंत गुरव, कराडच्या तहसीलदार कल्पना ढोबळे यांच्यासह विविध विभागांचे अधिकारी उपस्थित होते. या प्रकल्पामुळे येराड परिसरात पर्यटनाच्या नव्या संधी निर्माण होण्याची अपेक्षा आहे.