सातारा (प्रतिनिधी) – जिल्ह्यातील पश्चिम भागातील तालुक्यातील पर्यटनस्थळी जाण्यास येत्या रविवारपर्यंत (दि. २८) तात्पुरती बंदी घातली असल्याचा आदेश जिल्हाधिकारी जितेंद्र डुडी यांनी आज रात्री उशिरा दिला.

सातारा, महाबळेश्वर, जावळी, पाटण या तालुक्यातील पर्यटनस्थळांचा समावेश त्यात आहे. जिल्ह्यात अतिवृष्टी सुरु असून पुढील काही दिवस अतिवृष्टीचा इशारा देण्यात आला असल्याने सुरक्षिततेसाठी हा आदेश देण्यात आला आहे.

महाबळेश्वर तालुक्यातील लिंगमळा व भिलारे धबधबा तसेच सर्व पॉईंटस, पाटण मधील ओझर्डे व सडा वाघापूर, सातारा तालुक्यातील ठोसेघर, केळवली, वजराई, भांबवली धबधबे, कास तलाव तसेच जावळी तालुक्यातील एकजीव धबधबा आणि जिल्ह्यातील पर्यटनस्थळांवर तात्पुरती बंदी घातली आहे.