बाजारपेठेत खरेदीसाठी झुंबड; अनेक मंडळांकडून पारंपारिक वाद्यांच्या गजरात मिरवणूक
कराड – अत्यंत आनंदाच्या व उत्साहाच्या वातावरणात आज रविवार, दि. 15 रोजीपासून नवरात्रोत्सवाची सुरुवात झाली. सकाळी घरोघरी घटस्थापना करण्यात आली. त्यानंतर कराड व मलकापूर शहर आणि परिसरासह तालुक्‍यातील अनेक सार्वजनिक नवरात्रोत्सव मंडळांनी आदिशक्तीच्या आगमनाची तुतारी, ढोल, ताशा, धनगरी ढोल आदी. पारंपारिक वाद्यांच्या गजरात वाजत-गाजत स्वागत मिरवणूक काढून प्रतिष्ठापना केली. यावेळी दुर्गा माता की जय, उदे ग अंबे उदे, जय भवानी असा जयघोष करण्यात आला. याप्रसंगी सर्वत्र उत्साहाचे वातावरण निर्माण झाले होते.

येथील सोमवार पेठेतील कुंभारवाड्यासह कोयना नदीकाठी नगरपालिकेने तयार केलेल्या मूर्तिकारांच्या शेडजवळ कराड व मलकापूर शहर व परिसरासह तालुक्‍यातील अनेक सार्वजनिक नवरात्रोत्सव मंडळांनी सकाळी दुर्गा मूर्ती नेण्यासाठी मोठी गर्दी केली होती. दरम्यान, काल शनिवार, दि. 14 रोजी नवरात्रोत्सवास प्रारंभ होण्याच्या पूर्वसंध्येला कराड तालुक्‍यासह लगतच्या तालुक्‍यातील काही सार्वजनिक नवरात्रोत्सव मंडळांकडून आपली दुर्गा मूर्ती वाजत-गाजत नेण्यात आली. आदिशक्तीच्या आगमनाचा अबालवृद्ध, तसेच महिला नागरिकांमध्ये मोठा उत्साह असल्याचे दिसून आले.

दरम्यान, येथील बाजारपेठेत गेल्या दोन-तीन दिवसांपासून घटस्थापनेसाठी आवश्‍यक गोष्टींसह सार्वजनिक नवरात्रोत्सव मंडळाची उत्सवासाठी लागणाऱ्या विविध वस्तू खरेदीसाठी मोठी गर्दी झाल्याचे दिसून आले. यामध्ये घटस्थापनेसाठी आवश्‍यक घटाची माती, घट, खाऊची पाने, नारळ आदी. साहित्य खरेदीसाठी महिलांची मोठी गर्दी झाली होती. तसेच मंडळाच्या कार्यकर्त्यांनी मंडप सजावटीसाठी लागणारे साहित्य, नित्य पूजेसाठी लागणारे साहित्य, देवीसाठीचे विविध दागिने, देवीसाठी नऊ दिवसांतील नऊ रंगांच्या उत्सव साड्या, फळे व प्रसादाचे साहित्य खरेदी करण्यासाठी मोठी गर्दी केली होती.