प्रभात वृत्तसेवा सासवड – साकुर्डे (ता. पुरंदर) येथील ग्रामपंचायत सदस्य व माजी सरपंच सचिन अरूण थोपटे यांनी इतर मागासवर्गीय आरक्षित जागेवर बोगस कुणबी जातीचा दाखला दाखल करून निवडणूक लढवली होती. परंतु जात वैधता प्रमाणपत्र न देता निवडणूक लढवून विजयी झाले होते. बनावट प्रमाणपत्र दाखल केल्याविरोधात जात पडताळणी वैधता समितीकडे माजी ग्रामपंचायत सदस्य सतीश तुकाराम भोंगळे यांनी तक्रार दाखल केली होती. त्याची दखल घेत जात पडताळणी विभागाने सचिन थोपटे यांचा जातीचा दाखला अवैध ठरवला. जिल्हाधिकारी यांनी ग्रामपंचायत सदस्य पदावरून अपात्र केले. जात पडताळणी समितीने थोपटे यांची जात वैधता प्रमाणपत्र (दि.28) फेब्रुवारी 2024 रोजी रद्द केले होते. आता जिल्हाधिकारी जितेंद्र डुड्डी यांनी सचिन अरूण थोपटे यांना ग्रामपंचायत सदस्य पदावरून अपात्र ठरविले आहे. असे आदेश ग्रामपंचायत मुख्य कार्यकारी अधिकारी, पंचायत समितीला दिले आहेत. त्यांना जात वैधता प्रमाणपत्र सादर न केल्यामुळे अपात्रता लागू करण्यात येत असून (दि.11) जुलै 2024 पासून सदस्यपद वरून हटविण्यात आले असल्याचे आदेशात म्हटले आहे. निकाल लागला. परंतु न्याय मिळाला नाही. ग्रामपंचायत कार्यकाळ संपुष्टात आला. यानंतर निकाल लागला. हा ओबीसींवर अन्याय करणारे प्रशासकीय निर्णय आहे. वेळेत निर्णय देणे अपेक्षित आहे. जात पडताळणी समितीच्या निर्णयानंतर जिल्हाधिकारी यांनी निर्णय दोन वर्ष राखून ठेवला. तोही देताना अर्धवटच निकाल दिला आहे. जात वैधता प्रमाणपत्र जर नसेल तर दिलेल्या मदतीनंतर पद संपुष्टात येणे गरजेचे असताना देखील जिल्हाधिकाऱ्यांनी बेकायदेशीर व्यक्तीला तीन वर्ष ग्रामपंचायत सदस्य ठेवले आहे. ओबीसी आरक्षण अबाधितसाठी प्रयत्न करू पुरंदर तालुक्यातील झालेल्या निवडणुकीत कुणबी दाखल्याची माहिती निवडणूक आयोगाकडून घेऊ. जात वैधता प्रमाणपत्र नसणारे अपात्र सदस्य यांची माहिती घेऊ व ओबीसीच्या आरक्षण अबाधित ठेवण्यासाठी प्रयत्न करू, असे ग्रामपंचायत माजी सदस्य सतीश भोंगळे यांनी सांगितले.
