Sara Tendulkar becomes owner of Mumbai franchise in GEPL : भारतीय क्रिकेट संघाचा दिग्गज खेळाडू सचिन तेंडुलकरची मुलगी सारा तेंडुलकरने खूप कमी वयात अनेक कामगिरी केल्या आहेत. काही महिन्यांपूर्वी सचिन तेंडुलकरने सारा तेंडुलकरला त्याच्या फाउंडेशनची संचालक बनवले. तिच्या करिअरशी संबंधित कामांव्यतिरिक्त, सारा फाउंडेशनचे व्यवस्थापनही खूप चांगल्या प्रकारे करते. आता तिने आयपीएल २०२५ चा थरार सुरु असताना एक नवीन फ्रँचायझी खरेदी केली, ज्यामुळे सचिन तेंडुलकरसह अनेक लोकांनी तिचे कौतुक केले आहे.

सारा तेंडुलकरने खरेदी केली नवीन फ्रँचायझी –

सारा तेंडुलकरने ग्लोबल ई क्रिकेट प्रीमियर लीगमध्ये एक संघ खरेदी केला आहे. तिने मुंबई ग्रिझलीज फ्रँचायझी खरेदी केली आहे. ही एक गेमिंग लीग आहे, ज्यामध्ये १० संघ भाग घेतात. सारा तेंडुलकर आता मुंबई संघाची अधिकृत मालकीण झाली आहे. यावेळी सचिनने त्याची मुलगी साराला या नवीन भूमिकेत पाहून खूप अभिमान वाटत असल्याचे सांगितले. तिला नेहमीच लोकांना मदत करण्याची आणि समाजात योगदान देण्याची आवड राहिली आहे. तसेच सारा क्रिकेटची खूप मोठी चाहती आहे. ती बऱ्याचदा मैदानावर तिच्या भावाला आणि वडिलांना पाठिंबा देताना दिसली आहे.

सारा तेंडुलकरची आवडती आयपीएल टीम मुंबई इंडियन्स आहे, यामागील मुख्य कारण तिचे वडील सचिन तेंडुलकर मुंबई इंडियन्सशी संबंधित आहेत. आयपीएल २०२४ दरम्यान सारा तेंडुलकर मैदानावर दिसली होती. साराला मालकिनच्या भूमिकेत पाहण्यासाठी चाहते नक्कीच उत्सुक असतील. सारा तेंडुलकर तिच्या वैयक्तिक आयुष्यामुळे नेहमीच चर्चेत असते. ती सोशल मीडियावरील तिच्या पोस्टद्वारे तिच्या चाहत्यांचे खूप मनोरंजन करते.

हेही वाचा – Yashasvi Jaiswal : यशस्वी जैस्वालने IPL 2025 दरम्यान घेतला मोठा निर्णय! आता ‘या’ संघाकडून खेळताना दिसणार

सारा तेंडुलकर काय म्हणाली?

मुंबई फ्रँचायझी खरेदी करण्याबाबत सारा म्हणाली की, क्रिकेट हा आमच्या कुटुंबाचा अविभाज्य भाग आहे. ई-स्पोर्ट्समध्ये त्याची क्षमता एक्सप्लोर करणे रोमांचक आहे. जीईपीएलमध्ये मुंबई फ्रँचायझीचे मालक होणे हे माझ्यासाठी एक स्वप्न पूर्ण झाले आहे, ज्यामध्ये खेळाबद्दलची माझी आवड आणि शहराबद्दलचे प्रेम यांचा समावेश आहे. प्रेरणा आणि मनोरंजन देणारी एक प्रिय ई-स्पोर्ट्स फ्रँचायझी तयार करण्यासाठी आमच्या प्रतिभावान टीमसोबत भागीदारी करण्यास मी उत्सुक आहे.”