नवी दिल्ली : बंदी घातलेला दहशतवादी गट स्टुडंट्स इस्लामिक मुव्हमेंट ऑफ इंडियाचा (सिमी) माजी सदस्य साकिब नाचन याचे शनिवारी दिल्लीतील रुग्णालयात निधन झाले. एका अधिकाऱ्याने दिलेल्या माहितीनुसार, महाराष्ट्रातील ठाणे जिल्ह्यातील पडघा भागातील रहिवासी नाचन याला ब्रेन हॅमरेज झाल्याने चार दिवसांपूर्वी राजधानीतील एका खाजगी रुग्णालयात दाखल करण्यात आले होते.

२०२३ मध्ये, राष्ट्रीय तपास संस्थेने अर्थात एनआयएने दहशतवादी गट आयसिसविरुद्धच्या देशव्यापी कारवाईचा भाग म्हणून पडघा येथे छापा टाकला आणि नाचनसह अनेक लोकांना अटक केली होती. तिहार तुरुंगात बंद असलेला नाचन मंगळवारी अचानक आजारी पडला, त्यानंतर त्याला तातडीने रुग्णालयात दाखल करण्यात आले. डॉक्टरांच्या तपासणीत त्याला ब्रेन हॅमरेज झाल्याचे आढळले.

शनिवारी त्याची प्रकृती बिघडली आणि दुपारी १२:१० वाजता त्याचे निधन झाले, असे अधिकाऱ्याने सांगितले. पोस्टमॉर्टेमनंतर त्याचा मृतदेह कुटुंबाकडे सोपवण्यात येईल. रविवारी ठाण्याजवळील बोरिवली गावात अंत्यसंस्कार केले जातील. नाचन याचे सिमीशी दीर्घकाळ संबंध होते. २००१ मध्ये भारत सरकारने बेकायदेशीर कारवायांमुळे त्यावर बंदी घातली होती.

२०२३ मध्ये एनआयएच्या कारवाईत नाचनवर ISIS शी संबंधित कारवायांमध्ये सहभागी असल्याचा आरोप करण्यात आला होता. अटक झाल्यापासून तो तिहार तुरुंगात होता. या प्रकरणातील इतर आरोपींची चौकशीही सुरू आहे. नाचनच्या मृत्यूच्या बातमीने पडघा आणि आसपासच्या परिसरात चर्चा सुरू आहे. स्थानिकांनी सांगितले की त्याच्या प्रकृतीबद्दल त्यांना आधीच कोणतीही विशिष्ट माहिती नव्हती. एनआयए आणि दिल्ली पोलिसांनी अद्याप या प्रकरणावर कोणतेही अधिकृत निवेदन जारी केलेले नाही.