Sanjay Shirsat : संजय शिरसाट छत्रपती संभाजीनगरमध्ये गणेश विसर्जन मिरवणुकीला सुरुवात झाली आहे. संस्थान गणपतीपासून या मिरवणुकीला सुरुवात करण्यात आली.

यावेळी पालकमंत्री संजय शिरसाठ यांनी दुष्काळाच्या पार्श्वभूमीवर शेतकऱ्यांच्या परिस्थितीवर भाष्य करत गणरायाला शेतकऱ्यांना संकटातून बाहेर काढण्याचे साकडे घातले.

गणपती बाप्पाला निरोप देण्यासाठी सर्वपक्षीय नेते एकत्र आले असल्याचे संजय शिरसाठ यांनी सांगितले. माजी खासदार चंद्रकांत खैरे हे मोठे आणि वयस्कर नेते असल्याने त्यांचा आम्ही सन्मान करतो, असेही ते म्हणाले.

यंदाच्या गणेशोत्सवाला दुष्काळाची झळ लागली असून शेतकरी अडचणीत आहे. सर्व पिके हातची गेली आहेत. मुख्यमंत्री, उपमुख्यमंत्री आणि सर्व नेत्यांनी दुष्काळग्रस्त भागांचा दौरा केला आहे, असे शिरसाठ यांनी सांगितले.

आता पाऊस पडला तरी हातची गेलेली पिके पुन्हा येणार नाहीत; मात्र पाण्याचा प्रश्न दूर होण्यास मदत होईल. तसेच जनावरांच्या चाऱ्याचा प्रश्नही सुटला पाहिजे, अशी मागणी त्यांनी केली.

शेतकऱ्यांसाठी आर्थिक मदतीची घोषणा मुख्यमंत्र्यांनी कालच केली असून, त्याबाबतचा शासन निर्णय उद्या निघेल. नेमकी किती मदत दिली जाणार, याची घोषणा मुख्यमंत्री उद्या करतील, असेही संजय शिरसाठ यांनी सांगितले.