Sanjay Raut : लोकसभा अध्यक्ष ओम बिर्ला यांनी ठाकरेसेनेच्या सहा खासदारांचे उपमुख्यमंत्री एकनाथ शिंदे यांच्या शिवसेनेत विलीनीकरणास मंजुरी दिल्यानंतर, ठाकरेसेनेचे खासदार संजय राऊत (Sanjay Raut) यांनी रविवारी या कृतीला लोकशाहीची हत्या असल्याचे म्हटले.

ज्या खासदारांनी जळती मशाल या चिन्हावर निवडणूक जिंकली होती, त्यांना विकत घेण्यात आले. ही लोकशाहीची हत्या आहे आणि हा एक गंभीर गुन्हा आहे. हे लोक सिरीयल किलर आणि बलात्कारी आहेत, असे राऊत (Sanjay Raut) यांनी कोणाचेही नाव न घेता म्हटले.

राज्यघटनेच्या दहाव्या अनुसूचीनुसार फूट किंवा विलीनीकरणास परवानगी नाही, मग अध्यक्षांनी याला परवानगी कशी दिली, असा सवाल राऊत यांनी उपस्थित केला. पत्रकारांशी बोलताना राऊत यांनी शनिवारी पर्यावरणवादी कार्यकर्ते सोनम वांगचुक यांना रुग्णालयात हलवल्याबद्दल केंद्र सरकारवरही टीका केली.

वांगचुक यांच्या उपोषणाचा २१ वा दिवस असताना दिल्ली पोलिसांनी त्यांना बळजबरीने सफदरजंग रुग्णालयात नेले. लोकशाहीत सर्व प्रकारच्या आंदोलनांना परवानगी असते. महात्मा गांधींनी बेमुदत उपोषणाचा मार्ग निवडला होता आणि ब्रिटिशांना वाटाघाटी सुरू करण्यास भाग पाडले होते.

परंतु वांगचुक उपोषण करतात तेव्हा सरकार कोणतीही चर्चा करत नाही, उलट त्यांना आंदोलनस्थळावरून ओढत नेते. वांगचुक यांना रुग्णालयात नेण्यासाठी स्ट्रेचरही उपलब्ध करून दिले नाही. त्यांनी उपोषण सोडण्यासाठी त्यांच्यावर दबाव टाकला आणि याचा निषेध केला पाहिजे, असे राऊत (Sanjay Raut) म्हणाले.