मुंबई : भाजपच्या विरोधात देशातील सर्व विरोधी पक्षांनी एकत्र येण्यासाठी सर्वानी प्रयत्न करावे यासाठी पश्चिम बंगालच्या मुख्यमंत्री ममता बॅनर्जी यांनी सर्वपक्षीय नेत्यांना पत्र लिहिले आहे. आता त्याच पार्श्वभूमीवर शिवसेनेचे खासदार संजय राऊत यांनी महत्वाचे विधान केले आहे. त्यांनी यूपीएचे अध्यक्ष आणि काँग्रसचे अध्यक्ष हे दोन वेगळे विषय आहेत. युपीए  ही कोणाची खासगी मालमत्ता नाही. सध्या यूपीए आहे की नाही अशी शंका येत असल्याचे वक्तव्य राऊत यांनी केले आहे.

संजय राऊत यांनी युपीएच्या अध्यक्ष पदावरून केलेल्या वक्तव्यावरून शिवसेना काँग्रेसवर नाराज असल्याचे दिसत आहे.  पुढे बोलताना त्यांनी, “आता आताच्या परिस्थितीत यूपीएचे नेतृत्व करायचे असेल तर त्यासाठी काँग्रेसने पुढाकार घ्यायला हवा. पण काँग्रेस याबाबत पुढाकार घ्यायला तयार नसल्याचा आरोप देखील राऊत यांनी यावेळी केला. 2024 ची तयारी करायची असेल तर यूपीए मजबूत करावीच लागेल. त्यासाठी यूपीएच्या सातबाऱ्यावर अनेक नावे टाकावीच लागतील, असेही राऊत यावेळी म्हणाले. काँग्रेसने यूपीएच्या जिर्णोधाराची तयारी करायला हवी असेही त्यांनी म्हटले आहे.

दरम्यान, तेलंगणाचे मुख्यमंत्री के.चंद्रशेखर राव यांनी मुख्यमंत्री उद्धव ठाकरे यांची भेट घेऊन चर्चा केली आहे. ते नेतृत्व करायला इच्छुक नाहीत, पण जे नेतृत्व करेल त्यांच्या पाठिशी ते खंबरीपणाने उभे राहणार असल्याचे त्यांनी सांगितल्याचे राऊत म्हणाले. दिल्लीचे मुख्यमंत्री अरविंद केजरीवाल, पश्चिम बंगालच्या मुख्यमंत्री ममता बॅनर्जी हे नेतृत्व करण्याचा प्रयत्न करत असल्याचे राऊत यावेळी म्हणाले. राष्ट्रवादी काँग्रसचे अध्यक्ष शरद पवार हे या सर्व घडामोडींमध्ये आघाडीवर आहेत. सध्या यूपीए संदर्भात काँग्रेसकडून कोणत्याही प्रकारची हालचाल दिसत नाही, हे दुर्दैवी आहे. काँग्रेसने यूपीएच्या जिर्णोधाराची तयारी करायला हवी असे राऊत यावेळी म्हणाले.

पुढच्या निवडणुकीत जर भाजपला बहुमत मिळाले नाही तर पुन्हा एनडीए जन्माला येईल असेही राऊत म्हणाले. सध्या एनडीए पूर्णपणे संपला आहे. एनडीए अस्तित्वात नसल्याचे राऊत यांनी सांगितले. भाजपला आज गरज नसल्याचे मुळं एनडीए भंगारात काढली आहे. एनडीएतून बाहेर पडलेल्यांनी एकत्र बसावे, चर्चा करावी असी विषय समोर येत आहे. अकाली दलाच्या नेत्यांसोबत याबबत चर्चा झाल्याचे राऊत यावेळी म्हणाले. याबाबत मुख्यमंत्री उद्धव ठाकरे यांच्यासोबत चर्चा करणार आहे.

जेव्हा अनेक पक्षांचे सरकार असते तेव्हा नाराजी व्यक्त केली जाते. पण तिन्ही पक्षातील नेते यावर मार्ग काढतील असे राऊत यावेळी म्हणाले. भाजपला 22 कोटी मुस्लिमांचे महत्व कळले आहे, ही आनंदाची गोष्ट आहे. या देशावर प्रेम करणारे कोणत्याही धर्माचे लोक असोत ते या देशाचे आणि या देशाचे ते असे राऊत म्हणाले. शिवसेनेला जे जनाब म्हणतायेत त्यांनी आता ही जनाबगिरी का सुरु केली आहे, असा टोला देखील राऊत यांनी भाजपला लगावला. महागाईच्या विरोधातील आंदोलनात भाजपच्या खासदारांनी सुद्धा सामील व्हायला हवे असेही राऊत यावेळी म्हणाले.