Sangli News : कचरा टाकण्याच्या क्षुल्लक कारणावरून पेटलेल्या वादात एका महिलेचा हातोडा आणि चाकूने निर्घृण खून (Sangli News) करण्यात आला, तर तिच्या पतीलाही गंभीर जखमी करण्यात आले आहे. स्थानिक गुन्हे अन्वेषण शाखेने अवघ्या दोन तासांच्या आत या प्रकरणी फरीद अब्दुल शेख (वय ५२)या संशयिताला जेरबंद करण्यात पोलिसांना यश आलं आहे.

या घटनेत मनीषा मोहन केसरकर (वय ३५) यांचा मृत्यू झाला असून त्यांचे पती मोहन नागाप्पा केसरकर (वय ४५) हे गंभीर जखमी आहेत. १५ ऑगस्ट २०२६ रोजी सकाळी कुपवाड येथील विघ्नहर्ता शांती कॉलनीत घरासमोर (Sangli News) कचरा टाकण्याच्या कारणावरून शेजारी फरीद अब्दुल शेख आणि केसरकर कुटुंबीयांमध्ये शाब्दिक वाद झाला.

या वादाचं रुपांतर काही क्षणातच हिंसक भांडणात झालं. फरीदने घरातून हातोडा आणि चाकू आणत मोहन नागाप्पा केसरकर यांच्या डोक्यात हातोड्याने वार केले, तर त्यांची पत्नी मनीषा केसरकर यांच्या पोटात चाकूने वार करत त्यांना गंभीर जखमी केलं. उपचारादरम्यान मनीषा केसरकर यांचा मृत्यू झाला, तर मोहन केसरकर गंभीर जखमी असून त्यांच्यावर उपचार सुरू आहेत.

घटनेचं गांभीर्य लक्षात (Sangli News) घेत पोलीस अधीक्षक तुषार दोशी आणि अपर पोलीस अधीक्षक कल्पना बारवकर, उपअधीक्षक अजय कोकाटे यांनी स्थानिक गुन्हे अन्वेषण शाखेला तात्काळ आरोपीचा शोध घेऊन अटक करण्याचे आदेश दिले.

पोलीस निरीक्षक संजीव झाडे यांच्या मार्गदर्शनाखाली सहाय्यक पोलीस निरीक्षक प्रशांत निशाणदार यांच्या पथकाने फरीद शेख याला मिरज- सांगली रोडवरील वान्लेसवाडी येथे बंद पडलेल्या मैत्रेय बिल्डिंगजवळून ताब्यात घेतले. फरीद शेख याने गुन्ह्याची कबुली दिली आहे.