Sangli News : सांगली (Sangli News) सायबर पोलीस ठाण्याने केलेल्या कारवाईत डिजिटल अरेस्टच्या माध्यमातून फसवणूक करणाऱ्या आंतरराज्य टोळीला अटक केली आहे.

तासगाव येथील ६१ वर्षीय निवृत्त नागरिक आण्णासाहेब बाळगोंडा पाटील यांची तब्बल ५९ लाख ९ हजार रुपयांची फसवणूक करणाऱ्या या टोळीतील दोन संशयितांना अटक करण्यात आली आहे.

अटकेतील संशयितांनी स्वतःला सीबीआय, इन्कम टॅक्स, रिझर्व्ह बँक आणि सुप्रीम कोर्टचे वरिष्ठ पोलीस अधिकारी असल्याचे भासवले.

त्यांनी बनावट लेटर व लोगो वापरून व्हॉट्स ॲपवर पाठवले आणि व्हिडिओ कॉलद्वारे अटकेची भीती दाखवत फिर्यादींकडून पैसे उकळले. दि. ८ जानेवारी ते १६ जानेवारी २०२६ या कालावधीत ही फसवणूक झाली.

याप्रकरणी अबु हुसेन समसुल आलम (वय ३८, रा. हिंगे आडुनशिप, काळेपडळ रोड, हडपसर, पुणे. मूळ रा. बादुवा, ता. बुरवान, जि. मुर्शिदाबाद, पश्चिम बंगाल) व सुशील अकील राम (वय ३४, रा. ३ फ्लोरा, सिझन मॉल, आमनोरा मॉलसमोर, मगरपट्टा सिटी, पुणे. मूळ रा. पश्चिम बंगाल) यांनाअटक करण्यात आली आहे.

त्यांच्या घरझडतीत पोलिसांना ४ मोबाइल, १८ डेबिट/क्रेडिट कार्ड, ६ मोबाइल सीम, ६ रिकामे सीम पाकीट, ६ पासबुक, २४ चेकबुक आणि ३ आधार/पॅन कार्ड असा मुद्देमाल सापडला.

फसवणुकीच्या रकमेपैकी २९ लाख ६० हजार रुपये संशयितांच्या बँक खात्यावर जमा असल्याचे निष्पन्न झाले. पोलीस अधीक्षक तुषार दोषी यांच्या मार्गदर्शनाखाली, अपर पोलीस अधीक्षक कल्पना बारवकर यांच्या नेतृत्वाखाली पोलीस निरीक्षक स्नेहा गिरी, सहाय्यक पोलीस निरीक्षक रुपाली बोबडे, सतीश आलदर, करण परदेशी, रेखा कोळी, रुपाली पवार, सलमा इनामदार, कॅप्टन गुंडवाडे, विजय पाटणकर, अजय बेंद्रे या सायबर पथकाने ही कारवाई केली.

सध्या सायबर गुन्ह्यांचे प्रमाण मोठ्या प्रमाणात वाढत आहे. कोणीही फोन करून सीबीआय, इन्कम टॅक्स किंवा पोलीस अधिकारी असल्याचे सांगून पैशांची मागणी केल्यास त्वरित जवळच्या पोलीस ठाण्याशी संपर्क साधावा, असे आवाहन सांगली सायबर पोलिसांनी केले आहे.