Sangli News : मुंबईहून तासगावकडे निघालेल्या माऊली ट्रॅव्हल्सच्या खासगी प्रवासी बसचा मंगळवारी पहाटे घोगाव (चव्हाण मळा) येथे भीषण अपघात झाला. या दुर्घटनेत बसचे दोन्ही चालक जागीच ठार झाले, तर दोन प्रवासी किरकोळ जखमी झाले. बसमधील अन्य सुमारे २५ प्रवासी सुखरूप बचावल्याने मोठी जीवितहानी टळली. (Sangli News)

प्राथमिक माहितीनुसार, बसचा पुढील ॲक्सल अचानक तुटल्याने चालकाचे वाहनावरील नियंत्रण सुटले. त्यानंतर भरधाव बस रस्त्याच्या कडेला असलेल्या शेतात घुसली. अपघात इतका भीषण होता की बसच्या पुढील भागाचा अक्षरशः चक्काचूर झाला. (Sangli News)

या अपघातात मृत्यूमुखी पडलेले दोन्ही चालक चुलत भाऊ असल्याची माहिती समोर आली आहे. अपघातानंतर परिसरात एकच गोंधळ उडाला. स्थानिक नागरिकांनी तातडीने घटनास्थळी धाव घेत बचावकार्य सुरू केले आणि बसमधील प्रवाशांना सुरक्षित बाहेर काढले. (Sangli News)

जखमी झालेल्या दोन्ही प्रवाशांवर जवळच्या रुग्णालयात प्राथमिक उपचार करण्यात आले असून त्यांची प्रकृती स्थिर असल्याचे डॉक्टरांनी सांगितले आहे. उर्वरित प्रवाशांना पर्यायी वाहनाची व्यवस्था करून पुढील प्रवासासाठी रवाना करण्यात आले. (Sangli News)

घटनेची माहिती मिळताच कुंडल पोलिसांनी घटनास्थळी धाव घेत पंचनामा केला. प्राथमिक तपासात ॲक्सल तुटल्यामुळे हा अपघात झाल्याचा अंदाज व्यक्त करण्यात येत असला, तरी नेमके कारण तांत्रिक तपासणी आणि पोलिसांच्या सखोल चौकशीनंतर स्पष्ट होणार आहे. (Sangli News)

या भीषण अपघातामुळे परिसरात हळहळ व्यक्त होत असून मृत चालकांच्या कुटुंबीयांवर दुःखाचा डोंगर कोसळला आहे.