Sanam Teri Kasam Re-release: सध्या एकामागोमाग एक अनेक जुने सिनेमे थिएटरमध्ये पुन्हा रिलीज होत आहेत. ‘तुंबाड’, ‘लैला मजनू’, ‘जब वी मेट’, ‘ये जवानी है दीवानी’ या सारखे अनेक लोकप्रिय चित्रपट पुन्हा एकदा प्रेक्षकांना पाहण्याची संधी मिळाली. आता या यादीमध्ये आणखी एका चित्रपटाचा समावेश होणार आहे. 2016 साली रिलीज झालेला ‘सनम तेरी कसम’ हा सिनेमा पुन्हा पाहण्याची प्रेक्षकांना संधी मिळणार आहे.

अभिनेता हर्षवर्धन राणे आणि अभिनेत्री मावरा होकेनची प्रमुख भूमिका असलेला हा चित्रपट येत्या 7 फेब्रुवारीला पुन्हा थिएटरमध्ये रिलीज होणार आहे. व्हॅलेंटाइन डे च्या निमित्ताने प्रेक्षकांना ही प्रेमकथा मोठ्या पडद्यावर पाहता येणार आहे.

2016 मध्ये रिलीज झाल्यानंतर या चित्रपटाला बॉक्स ऑफिसवर फारसा चांगला प्रतिसाद मिळाला नव्हता. या चित्रपटाने जगभरातून जवळपास 16 कोटी रुपयांची कमाई केली होती. मात्र, नंतर या चित्रपटाला प्रेक्षकांचे भरभरून प्रेम मिळाले. या चित्रपटाची गाणी देखील विशेष गाजली होती. त्यामुळे आता निर्मात्यांनी पुन्हा एकदा हा चित्रपट रिलीज करण्याचा निर्णय घेतला आहे. या चित्रपटाच्या सीक्वलची देखील लवकरच घोषणा होण्याची शक्यता आहे.

‘सनम तेरी कसम’चे दिग्दर्शन राधिका राव आणि विनय सप्रू यांनी केले आहे. तर यामध्ये हर्षवर्धन राणे आणि मावरा होकेनसह मनीष चौधरी, मुरली शर्मा, अनुराग सिन्हा, विजय राज, सुदेश बेरी, कमल आदिब हे कलाकार महत्त्वाच्या भूमिकेत आहेत. आता पुन्हा थिएटरमध्ये रिलीज झाल्यानंतर या चित्रपटाला प्रेक्षकांचा कसा प्रतिसाद मिळणार, हे पाहणे महत्त्वाचे ठरेल.