Maatrubhumi Trailer : बॉलिवूडचा भाईजान सलमान खान याच्या बहुप्रतीक्षित ‘मातृभूमी’ चित्रपटाच्या प्रदर्शनाचा मार्ग अखेर मोकळा झाला आहे. अनेक दिवसांच्या प्रतीक्षेनंतर अखेर हा चित्रपट ४ डिसेंबर रोजी देशभरातील चित्रपटगृहांमध्ये प्रदर्शित होणार आहे.

नुकताच चित्रपटाचा ट्रेलर प्रेक्षकांच्या भेटीला आला. मात्र, ट्रेलर प्रदर्शित होताच सोशल मीडियावर ट्रेलरममध्ये दाखवण्यात आलेले काही संवाद, अभिनय आणि व्हिज्युअल इफेक्ट्सवरून नेटकऱ्यांनी टीकेची झोड उठवली आहे.

‘मातृभूमी’च्या ट्रेलरमध्ये सलमान खान दमदार ॲक्शन सीन्स करताना झळकला आहे. मात्र, चित्रपटातील काही संवादांमुळे प्रेक्षकांनी नाराजी व्यक्त केली आहे. ट्रेलरमधील ‘सिचवानमध्ये काहीतरी गडबड आहे’ हा संवाद चर्चेचा विषय ठरला आहे. तर दुसऱ्या एका प्रसंगात सलमानचे पात्र चिनी सैनिकाला उद्देशून, ‘चला, हा गोंधळ मिटवूया, ब्रो’ असे म्हणताना दिसते.

या संवादांवर सोशल मीडिया युजर्सनी वेगवेगळ्या प्रतिक्रिया दिल्या आहेत. एका युजरने, ‘सिचवानमध्ये काहीतरी गडबड आहे… भावा, हा काय मूर्खपणा आहे? युद्धाच्या वेळी कोणता सैनिक असं बोलतो?’ अशी प्रतिक्रिया दिली. तर दुसऱ्या युजरने, ‘सलमान भाई गंभीर चित्रपट करणार आहे की नाही?’ असा थेट सवाल उपस्थित केला.

@BeingSalmanKhan @IChitrangda @LakhiaApoorva @JasonThamIndia @TheAnkurBhatia @TanyaDesai4 @SalmanKhan should retire. Such terrible acting… Yes, Salman has given a lot to Hindi cinema, but now I get bored watching the same kind of acting from him over and over.

— XHotBite (@XHotBite) November 10, 2026

आणखी एका युजरने, ‘भाई आणि त्याच्या खेळकर संवादांची कहाणी सुरूच आहे,’ असे म्हटले. तर एका नेटकऱ्याने सलमाननेच चित्रपटाचे संवाद लिहिले असावेत, असा टोला लगावला. संवाद विनोदी वाटत असले तरी त्यामुळे चित्रपटाचे गांभीर्य कमी होत असल्याची टीकाही काहींनी केली.

केवळ संवादच नव्हे, तर ट्रेलरमधील अभिनय आणि AI तंत्रज्ञानाच्या वापरावरही प्रश्न उपस्थित केले जात आहेत. कीही नेटकऱ्यांनी ट्रेलरमधील AI आणि VFX दर्जाहीन असल्याचे म्हणत नाराजी व्यक्त केली. एका युजरने तर सलमान खानने आता निवृत्ती घ्यावी, अशी थेट मागणीच केली आहे.

दरम्यान, ‘मातृभूमी’चे दिग्दर्शन अपूर्व लाखिया यांनी केले असून, या चित्रपटात सलमान खानसोबत अभिनेत्री चित्रांगदा सिंग मुख्य भूमिकेत दिसणार आहे. हा चित्रपट २०२० मध्ये गलवान खोऱ्यात भारत आणि चीनच्या सैनिकांमध्ये झालेल्या संघर्षाच्या पार्श्वभूमीवर आधारित आहे. देशसेवा करताना भारतीय जवानांना आणि त्यांच्या कुटुंबीयांना कोणत्या परिस्थितीचा सामना करावा लागतो, हे या चित्रपटातून मांडण्याचा प्रयत्न करण्यात आला असल्याचे सांगितले जात आहे.

Tukaram Mundhe : ‘चलता है’ असे धोरण सोडा; खाद्यपदार्थांच्या निकृष्ट दर्जावरुन तुकाराम मुंडेंचे आवाहन