Maatrubhumi Trailer: बॉलिवूड अभिनेता सलमान खानच्या आगामी ‘मातृभूमी : मे वॉर रेस्ट इन पीस’ या चित्रपटाची प्रेक्षकांमध्ये बरीच चर्चा आहे. या चित्रपटाची चाहते आतुरतेने वाट पाहत असतानाच निर्मात्यांनी चित्रपटाचा ट्रेलर प्रदर्शित केला आहे. ट्रेलरमध्ये सलमान खान एका दमदार अ‍ॅक्शन अवतारात दिसत आहे. तर अभिनेत्री चित्रांगदा सिंह हिच्या वेगळ्या अंदाजानेही प्रेक्षकांचे लक्ष वेधून घेतले आहे. देशभक्ती, भारतीय सैनिकांचे शौर्य, सीमेवरील संघर्ष आणि सैनिकांच्या भावविश्वाची झलक या ट्रेलरमध्ये पाहायला मिळते. त्यामुळे चित्रपटाबद्दलची प्रेक्षकांची उत्सुकता आणखी वाढली आहे.

कसा आहे ‘मातृभूमी’चा ट्रेलर?

जवळपास साडेचार मिनिटांच्या या ट्रेलरची सुरुवात चिनी सैनिकांच्या संवादाने होते. यामध्ये ते भारतीय सैन्याबद्दल चर्चा करताना दिसतात. त्यानंतर भारत आणि चीनच्या सैनिकांमधील तणावपूर्ण परिस्थिती दाखवण्यात आली आहे. दोन्ही देशांच्या सैनिकांमध्ये निर्माण झालेला संघर्ष आणि सीमेवर घडणाऱ्या घडामोडींची झलक ट्रेलरमध्ये पाहायला मिळते.

याशिवाय भारतीय सैनिक आपल्या कुटुंबाचा निरोप घेऊन देशाच्या रक्षणासाठी सीमेवर जात असल्याचेही दाखवण्यात आले आहे. सैनिकांच्या आयुष्यातील भावनिक बाजू आणि देशासाठी कर्तव्य बजावताना त्यांना करावा लागणारा संघर्ष यावरही चित्रपटात प्रकाश टाकण्यात आला आहे.

ट्रेलरमधील एका प्रसंगात सलमान खान म्हणतो की, ‘आपल्या बाजूने एकही गोळी झाडली जाणार नाही.’ त्यानंतर दोन्ही देशांच्या सैनिकांमध्ये संघर्ष सुरू झाल्याचे दाखवण्यात आले आहे. सलमान खानचा अ‍ॅक्शन अंदाज, त्याचे संवाद आणि सैनिकाच्या भूमिकेतील त्याची देहबोली लक्षवेधी ठरते. ट्रेलरच्या शेवटी दोन्ही देशांचे सैनिक एकमेकांना अभिवादन करताना दिसतात. त्यामुळे चित्रपट केवळ युद्धावर आधारित नसून शांततेचा संदेशही देणार असल्याचे संकेत मिळतात.

 

View this post on Instagram

 

चित्रांगदा सिंहची भूमिकाही महत्त्वाची

या चित्रपटात सलमान खानसोबत अभिनेत्री चित्रांगदा सिंह मुख्य भूमिकेत आहे. तिने सलमानच्या पत्नीची भूमिका साकारली आहे. ट्रेलरमध्ये दोघांमधील काही रोमँटिक प्रसंगही पाहायला मिळतात. एकीकडे सीमेवर देशासाठी लढणारा सैनिक आणि दुसरीकडे त्याच्या कुटुंबाची काळजी घेणारी पत्नी, अशी भावनिक बाजू चित्रपटात दाखवण्यात आली आहे. युद्धाच्या पार्श्वभूमीवर पती-पत्नीमधील नाते आणि सैनिकांच्या कुटुंबीयांच्या भावना चित्रपटात महत्त्वाच्या ठरणार आहेत.

सलमान खानने घेतली विशेष मेहनत

या चित्रपटातील भूमिकेसाठी सलमान खानने विशेष मेहनत घेतल्याचे सांगितले जात आहे. सैनिकाची देहबोली, शारीरिक क्षमता आणि कठीण परिस्थितीत काम करण्याची तयारी यासाठी त्याने स्वतःला तयार केले. चित्रपटात त्याने कर्नल बी. संतोष बाबू यांची भूमिका साकारली आहे. या भूमिकेसाठी त्याने कठोर फिटनेस रूटीनचे पालन केले. तसेच लडाखमधील उंचावरील आणि आव्हानात्मक वातावरणात प्रशिक्षणही घेतले. एका सैनिकाची शारीरिक क्षमता आणि त्याची सहनशक्ती पडद्यावर प्रभावीपणे दाखवण्यासाठी त्याने मेहनत घेतली आहे.

काय आहे चित्रपटाची कथा आणि कलाकार?

‘मातृभूमी : मे वॉर रेस्ट इन पीस’ हा चित्रपट २०२० मध्ये भारत आणि चीनच्या सैनिकांमध्ये गलवान खोऱ्यात झालेल्या संघर्षाच्या घटनांपासून प्रेरित आहे. या चित्रपटाचे दिग्दर्शन अपूर्व लाखिया यांनी केले आहे. तर सलमान खान या चित्रपटाचा निर्माता आहे. सलमान खान फिल्म्सच्या बॅनरखाली या चित्रपटाची निर्मिती करण्यात आली आहे.

चित्रपटात सलमान खान आणि चित्रांगदा सिंह यांच्यासोबत अनूप बिक्रम शाही, मुकेश ऋषी, अंकुर भाटिया आणि अभिलाष चौधरी यांसारखे कलाकारही महत्त्वाच्या भूमिकांमध्ये दिसणार आहेत. विशेष म्हणजे, या चित्रपटाचे नाव आधी ‘बॅटल ऑफ गलवान’ असे होते. मात्र, नंतर त्याचे नाव बदलून ‘मातृभूमी : मे वॉर रेस्ट इन पीस’ असे करण्यात आले.

कधी प्रदर्शित होणार चित्रपट?

सलमान खानचा हा चित्रपट आधी एप्रिल २०२६ मध्ये प्रदर्शित होणार होता. मात्र, व्हीएफएक्स आणि पोस्ट प्रोडक्शनच्या कामाला विलंब झाल्याने चित्रपटाची रिलीज पुढे ढकलण्यात आली. आता हा चित्रपट ४ डिसेंबर २०२६ रोजी चित्रपटगृहांमध्ये प्रदर्शित होणार आहे. ट्रेलरला मिळणारा प्रतिसाद पाहता सलमान खानच्या चाहत्यांना या चित्रपटाकडून मोठ्या अपेक्षा आहेत.