Sairaj Bahutule Statement On Vaibhav Sooryavanshi Fight : श्रीलंकेतील दांबुलाच्या मैदानावर भारत ‘अ’ आणि श्रीलंका ‘अ’ यांच्यातील सुपर ओव्हर सामन्यात झालेल्या भयंकर वादानंतर क्रिकेट जगतात प्रचंड खळबळ उडाली आहे. १५ वर्षांचा भारतीय सलामीवीर वैभव सूर्यवंशी आणि श्रीलंकेचा विशेन हलंबागे यांच्यातील धक्कामुक्कीचा व्हिडिओ व्हायरल झाल्यानंतर आता भारतीय गोटातून पहिली मोठी प्रतिक्रिया आली आहे. भारतीय ‘अ’ संघाचे मुख्य फिरकी गोलंदाजी प्रशिक्षक साईराज बहुतुले यांनी या वादावर अधिकृत प्रतिक्रिया दिली आहे.

“मी वैभवला ओळखतो, तो शांत स्वभावाचा मुलगा आहे” –

मैदानावरील या दुर्दैवी घटनेवर तीव्र नाराजी व्यक्त करत प्रशिक्षक साईराज बहुतुले म्हणाले, “नेमकं मैदानावर त्या क्षणी काय घडलं आणि कोणती वाक्ये बोलली गेली, याची पूर्ण माहिती अद्याप आम्हाला मिळालेली नाही. मात्र, मी वैभव सूर्यवंशीला खूप जवळून आणि वैयक्तिकरित्या ओळखतो. तो अत्यंत शांत आणि संयमी स्वभावाचा मुलगा आहे. त्याला उगाचच चिथावणी दिली गेल्यामुळेच ही परिस्थिती निर्माण झाली असावी. या संवेदनशील प्रकरणावर आम्ही भारतीय संघ व्यवस्थापनांतर्गत सविस्तर चर्चा करणार आहोत.” युवा खेळाडूंना मैदानातील वर्तनाबाबत योग्य मार्गदर्शन करणे किती गरजेचे आहे, यावरही त्यांनी भर दिला.

“श्रीलंकन खेळाडूंनाही मैदानावर कसं वागावं हे शिकवलं पाहिजे” –

श्रीलंकेच्या स्लेजिंग करणाऱ्या खेळाडूंवर थेट निशाणा साधताना बहुतुले पुढे म्हणाले, “माझ्या मते, श्रीलंकन खेळाडूंनाही आंतरराष्ट्रीय मैदानावर प्रतिस्पर्ध्यांशी कसं वागावं आणि कोणती मर्यादा पाळावी, हे तिथल्या व्यवस्थापनाने शिकवलं पाहिजे. अर्थात, ही गोष्ट आमच्याही खेळाडूंना तितकीच लागू होते. श्रीलंकेच्या संघातही अनेक मोठे आणि अनुभवी प्रशिक्षक आहेत, ते त्यांच्या खेळाडूंना योग्य समज देतील अशी मला आशा आहे.”

हेही वाचा – Sri Lanka Players Penalized : भारत-श्रीलंका ‘अ’ संघातील राड्याप्रकरणी पहिली मोठी कारवाई! मॅच रेफरीने श्रीलंकेच्या २ खेळाडूंना सुनावली शिक्षा

वैभव अजून खूप लहान आणि युवा खेळाडू आहे, त्याच्यावर भारताचे मोठे भविष्य अवलंबून आहे. त्याला अशा वादांपासून दूर राहण्यासाठी आम्ही स्वतः वैयक्तिक मार्गदर्शन करू आणि भविष्यात त्याच्याकडून अशी चूक होणार नाही, असा विश्वासही बहुतुले यांनी व्यक्त केला.