Ruturaj Gaikwad on Duleep Trophy 2025 : सलामीवीर ऋतुराज गायकवाडने गुरुवारी दुलीप ट्रॉफी २०२५ सेमीफायनलच्या पहिल्या दिवशी सेंट्रल झोनविरुद्ध वेस्ट झोनसाठी १८४ धावांची शानदार खेळी करत संघाला मजबूत स्थितीत आणले. त्याच्या या खेळीच्या जोरावर वेस्ट झोनने पहिल्या दिवसअखेर ६ बाद ३६३ धावा केल्या. गायकवाडने २०६ चेंडूंचा सामना करत १८४ धावांची खेळी साकारली . यापूर्वी त्याने गेल्या महिन्यात बुची बाबू ट्रॉफी स्पर्धेत हिमाचल प्रदेशविरुद्ध महाराष्ट्रासाठी १३३ धावांची खेळी केली होती. ऋतुराज गायकवाडने सांगितले की, एप्रिलमध्ये राजस्थान रॉयल्सविरुद्धच्या सामन्यात कोपराला झालेल्या दुखापतीमुळे त्याला आयपीएल २०२५ आणि इंग्लंड लायन्सविरुद्धच्या भारत ‘अ’ मालिकेतून बाहेर राहावे लागले. तसेच, वैयक्तिक कारणांमुळे यॉर्कशरबरोबरचा काउंटी करारही त्याने रद्द केला. या ब्रेकचा फायदा घेत त्याने लाल चेंडूच्या क्रिकेटवर लक्ष केंद्रित केले. अजून बरेच काही साध्य करायचंय – ऋतुराज गायकवाड म्हणाला, “भारत ‘अ’ मालिकेत न खेळल्याने मला तयारीसाठी पुरेसा वेळ मिळाला. मी लाल चेंडूच्या क्रिकेटवर काम केले आणि अजूनही त्यावर मेहनत सुरू आहे. मला अजून बरेच काही साध्य करायचे आहे.” या सामन्यात वेस्ट झोनची सुरुवात खराब झाली होती. यशस्वी जैस्वाल (४) याला खलील अहमदने आणि हार्विक देसाई (१) याला दीपक चहरने यश राठोडकरवी झेलबाद केले. हेही वाचा – Lalit Modi : ‘त्या दिवशी मी सर्व नियम मोडले…’, IPL च्या पहिल्या सामन्याबद्दल ललित मोदींचा सर्वात मोठा खुलासा ऋतुराज गायकवाडने सावरला डाव – वेस्ट झोनची अवस्था २ बाद १० धावा अशी बिकट असताना ऋतुराज गायकवाडने मधल्या फळीत येत आर्य देसाईसह तिसऱ्या विकेटसाठी ९० धावांची महत्त्वपूर्ण भागीदारी केली. त्याने ८५ चेंडूत अर्धशतक आणि १३१ चेंडूत शतक पूर्ण केले, दुसरे अर्धशतक अवघ्या ५१ चेंडूत फटकावले. गायकवाडच्या या शतकी खेळीने वेस्ट झोनला पहिल्या दिवशी सेंट्रल झोनविरुद्ध वर्चस्व राखण्यास मदत केली. त्याच्या या कामगिरीने लाल चेंडूच्या क्रिकेटमधील त्याचे कौशल्य पुन्हा एकदा अधोरेखित झाले आहे.
