Ruturaj Replaces Virat : टीम इंडियात मोठे फेरबदल! अफगाणिस्तानविरुद्धच्या मालिकेपूर्वी विराटच्या जागी ‘या’ स्टार खेळाडूला मिळणार संधी
Ruturaj Replaces Virat : भारतीय क्रिकेट वर्तुळात मोठी चिंता निर्माण झाली होती. मात्र, आता निवड समितीने विराटला रिप्लेस करण्यासाठी एका जबरदस्त खेळाडूची निवड केली आहे.
Ruturaj Gaikwad Replaces Virat Kohli IND vs AFG : स्टार फलंदाज विराट कोहली हॅमस्ट्रिंगच्या दुखापतीमुळे अफगाणिस्तानविरुद्धच्या आगामी ३ सामन्यांच्या वनडे मालिकेतून बाहेर पडला आहे. ज्यामुळे भारतीय क्रिकेट वर्तुळात मोठी चिंता निर्माण झाली होती. मात्र, आता निवड समितीने विराटला रिप्लेस करण्यासाठी एका जबरदस्त खेळाडूची निवड केली आहे. ‘द इंडियन एक्स्प्रेस’च्या वृत्तानुसार, टीम इंडियामध्ये विराट कोहलीच्या जागी महाराष्ट्राचा धडाकेबाज फलंदाज ऋतुराज गायकवाड याची एन्ट्री होणार आहे. ऋतुराजच्या येण्याने भारतीय संघाला फलंदाजीत मजबूती तर मिळेलच, सोबतीला ओपनिंगचा एक उत्तम पर्यायही उपलब्ध होणार आहे.
ऋतुराजच्या जागी रजत पाटीदारची ‘इंडिया ए’ संघात एन्ट्री!
ऋतुराज गायकवाड हा वास्तविक आगामी श्रीलंका दौऱ्यावर जाणाऱ्या ‘इंडिया ए’ संघाचा उपकर्णधार होता. मात्र, त्याला मुख्य संघात बोलावण्यात आल्यामुळे आता ‘इंडिया ए’ संघात त्याची जागा कोण घेणार, असा प्रश्न निर्माण झाला होता. रिपोर्टनुसार, आयपीएल २०२६ मध्ये रॉयल चॅलेंजर्स बंगळुरुला सलग दुसऱ्यांदा चॅम्पियन बनवण्यात महत्त्वाची भूमिका बजावणाऱ्या रजत पाटीदारला ऋतुराजच्या जागी ‘इंडिया ए’ संघात संधी दिली जाणार आहे. रजत सध्या मध्य प्रदेश प्रीमियर लीगमध्ये खेळत आहे.
🚨 REPORTS 🚨
Ruturaj Gaikwad is likely to replace Virat Kohli in India’s ODI squad for the upcoming series against Afghanistan. 🇮🇳
(Source: Devendra Pandey)#Cricket #India #ODI pic.twitter.com/mS6Rf65vgp
— Sportskeeda (@Sportskeeda) June 4, 2026
ऋतुराजची वनडे कारकीर्द आणि प्लेइंग इलेव्हनचे समीकरण
ऋतुराज गायकवाडने भारतासाठी आतापर्यंत ९ वन-डे सामने खेळले असून, २८.५० च्या सरासरीने २२८ धावा केल्या आहेत. यादरम्यान त्याने एक शतक आणि एक अर्धशतक झळकावले आहे. त्याने आपला शेवटचा वनडे सामना गेल्या वर्षी डिसेंबरमध्ये दक्षिण आफ्रिकेविरुद्ध खेळला होता.
दरम्यान, ऋतुराज गायकवाड मुख्य संघात सामील होणार असला तरी, अफगाणिस्तानविरुद्धच्या पहिल्या सामन्यात त्याला प्लेइंग इलेव्हनमध्ये थेट संधी मिळणार का, याबाबत शंका आहे. कारण, विराट कोहलीच्या अनुपस्थितीत मधल्या फळीत खेळण्यासाठी यष्टीरक्षक फलंदाज इशान किशन हा सध्यातरी प्लेइंग इलेव्हनचा पहिला आणि प्रबळ दावेदार मानला जात आहे. १३ जूनपासून धरमशाला येथे या वनडे मालिकेला सुरुवात होणार आहे.
